İldırım Qurbanov: "Çalışmalıyıq ki, türk iş adamları ilə birlikdə Azərbaycanda rəqabətə davamlı, keyfiyyətə söykənən yüngül sənaye kompleksi yaradaq"
Türkiyə Respublikasının İqtisadiyyat Nazirliyinə bağlı Şərqi Qara Dəniz İxracatçılar Birliyinin təşkilatçılığı ilə mayın 5-də Türkiyə-Azərbaycan Biznes Forumu başlayıb. Sözügedən tədbirdə 30 nəfərlik türk iş adamlarından ibarət nümayəndə heyəti iştirak edir. Forum çərçivəsində hər iki ölkənin iş adamları arasında ikitərəfli görüşlərin keçirilməsi nəzərdə tutulub.
Biznes forumda inşaat və elektrik materialları, qida məhsulları, plastik, havalandırma, ev, ofis və restoran mebelləri, tekstil və s. sektorlarda fəaliyyət göstərən, beynəlxalq standartlara cavab verən məhsul istehsalı və ixracı ilə məşğul olan türk firmaları iştirak edir.
O da məlumdur ki, Türkiyə iş adamları zəngin təcrübəyə malikdir və bir sıra ölkələrdə iqtisadiyyatın müxtəlif sektorlarına sərmayə qoyur. Türkiyəli investorlar 2001-2014-cü illər ərzində bir sıra ölkələrə 226 milyard 814 milyon dollar investisiya qoyub. Ən çox vəsait əsasən kənd təsərrüfatı, sənaye və xidmət sahəsinə yatırılıb. Türkiyəli investorların 2001-2014-cü illər ərzində ən çox pul yatırdığı ölkə isə Hollandiyadır-75 milyard 891 milyon dollar. Siyahıda ikinci yerdə isə Azərbaycan gəlir. Belə ki, bu illər ərzində Türkiyə iş adamları Azərbaycana 45 milyard 449 milyon dollar sərmayə yatırıb.
Bütün bu deyilənlərin fonunda, sözügedən forum Azərbaycanda qeyri-neft sektorunun inkişafında, qeyri-neft məhsullarının ixracında necə rol oynayacaq?
Məsələyə münasibət bildirən iqtisadçı-ekspert İldırım Qurbanovun sözlərinə görə, qeyri-neft sektorunun inkişaf etdirilməsi çox vacibdir: "Sonuncu dəfə Yevlax rayonunda keçirilən müşavirədə cənab Prezident bu məsələyə xüsusi olaraq toxundu. O, yerli istehsalın daha çox keyfiyyətli olmasını təmin etmək üçün tapşırıqlar verdi. Tək məhsulun istehsalı yox, həm də ixrac olunması məsələsi sahibkarlar qarşısında qoyuldu. Qeyri-neft sektorunun inkişaf etdirilməsində qardaş Türkiyə bizim üçün çox əlverişli iqtisadi tərəfdaşdır. Bu kontekstdə xüsusən bütün diqqəti kənd təsərrüfatına yönəltmək lazımdır. Türkiyədə bütün torpaqlar əkilir, boş ərazi tapmaq çətindir, kənd təsərrüfatı məhsullarının istehsalı və ixracı üzrə ixtisaslaşıblar. Avropanın bir sıra inkişaf etmiş ölkələrinə məhsul ixrac edirlər. Türklər çox yüksək rentabelli iqtisadiyyat qurub. İqtisadiyyatın bütün sahələrində onlar fəaldır. Hesab edirəm ki, bu təcrübədən maksimum yararlanmaq lazımdır. Bizdə Aqrar Universitet var. Fikrimcə, yaxşı olar ki, oranın tələbələri Türkiyəyə təcrübə keçməyə göndərilsin. Bu istiqamətdə bizim sahibkarlar üçün təlimlər təşkil olunsun, bu sahədə yetişmiş mütəxəssislərimiz bu təlimləri keçsin. İşini bilənlər iş başına gətirilsin, şəffaf işləyən mütəxəssislərə dəyər vermək lazımdır. Bu gün o qədər savadlı, bacarıqlı mütəxəssis var ki, öz ixtisasına uyğun çalışmır, onları bu sahədə, kiminsə qohumu, tanışıdır deyə, başqaları əvəzləyir. O üzdən, əsl potensialı olan kadrlara üstünlük vermək lazımdır. İnsan kapitalı çox mühümdür. Ən dəyərli kapital da məhz insan kapitalıdır. Ən nəhayət, türkiyəli sahibkarların yüngül sənaye sahəsində yaxşı təcrübəsi var. Çalışmalıyıq ki, türk iş adamları ilə birlikdə Azərbaycanda rəqabətə davamlı, keyfiyyətə söykənən yüngül sənaye kompleksi yaradaq". Vidadi ORDAHALLI
