Zakir Əhmədov: "Bu da, öz növbəsində, inflyasiyanın cilovlanmasına gətirib çıxaracaq"
Beynəlxalq Valyuta Fondu 2017-ci ildə Qafqaz və Mərkəzi Asiya regionu ölkələrində ÜDM-in 3,1 %, 2018-ci ildə 4,1 % artacağını proqnozlaşdırır. Bu barədə BVF-nin yaydığı bülletendə bildirilir. "Neft ixrac və idxal edən ölkələrdə iqtisadi artım templəri sürətlənib. Buna baxmayaraq, iqtisadi artım tempi 2000-2013-cü illərdə müşahidə olunan tempdən daha aşağıdır", - deyə sənəddə qeyd edilib.
2016-cı ildə Qafqaz və Mərkəzi Asiya ölkələrinin ÜDM-i 2,4 % artıb. Regiondakı neft ixrac edən ölkələrin ÜDM-i 2017-ci ildə 3,1 %, 2018-ci ildə 4,1 % artacaq. Ötən il bu ölkələrdə iqtisadi artım tempi 2,2 % təşkil edib.
Neft idxal edən ölkələrin iqtisadiyyatı isə bu il 3,6 %, növbəti il 3,9 % böyüyəcək. Ötən il bu göstərici 3,3 % idi.
Bülletenə əsasən, 2017-ci ildə neft ixrac edən ölkələrdə dövlət büdcəsinin kəsiri (neft satışından əldə olunan gəlirlər nəzərə alınmadan) ÜDM-in 20,6 %-nə, 2018-ci ildə isə 13,5 %-nə (2016-cı ildə 14,9 %) bərabər olacaq: "Bunun əsas səbəbi Qazaxıstanın bank sisteminə kompleks dəstəyin verilməsi və Azərbaycan Dövlət Neft Fondu (ARDNF) tərəfindən Mərkəzi Banka (AMB) öhdəliklərinin yerinə yetirilməsi üçün transferin həyata keçirilməsidir".
BVF ekspertləri hesab edir ki, ötən il neft ixrac edən ölkələrdə inflyasiyanın səviyyəsi 11,5 % təşkil etdiyi halda, 2017-ci ildə bu göstərici 8,3 %, 2018-ci ildə isə 7,6 %-ə enəcək: "Qazaxıstanın milli valyutası olan tengənin möhkəmlənməsi və büdcə dövlət xərclərinin azalması bu ölkədə inflyasiya təzyiqlərini azaldır. Bundan başqa, Azərbaycanda inflyasiya səngiyir və perspektivdə bu proses davam edəcək. Azərbaycan hökuməti büdcə konsolidasiyasını planlaşdırır və sərt pul-kredit siyasəti yürüdür".
Hər halda, Azərbaycanda inflyasiyanın səngiməsi tendensiyası müsbət dinamikadır. Eyni zamanda, bu, növbəti illərdə iqtisadi artımın olacağından xəbər verir. Maraqlıdır, bəs ekspertlər BVF-nin Azərbaycanda inflyasiyanın səngiməsi proqnozunu necə dəyərləndirir? Məsələyə münasibət bildirən ekspert Zakir Əhmədovun fikrincə, verilən proqnoz reallığı əks etdirir. O bunu bir sıra iqtisadi arqumentlərlə əsaslandırdı: "Məsələ ondadır ki, 2016-cı ilin birinci rübünün müvafiq göstəriciləri ilə müqayisədə cari ilin birinci rübündə iqtisadiyyatda pozitiv meyllər artıq özünü göstərməyə başlayıb. Bu o deməkdir ki, iqtisadiyyatda geriləmə dayanıb. Neftin qiymətinin də müəyyən bir həddə qədər qalxaraq sabitləşməsi bu tendensiyanın inkişafına müsbət təsir göstərir. Nəzərə almaq lazımdır ki, ötən ilin ilk üç ayı ərzində neftin dünya bazarlarında orta qiyməti 35 dollar olmuşdusa, cari ilin birinci rübü ərzində bu rəqəm təqribən 55 dollar, yəni ötən ilin müvafiq dövründəkindən 20 dollar artıq olub. Başqa bir tərəfdən, Azərbaycanda real sektorun hərtərəfli inkişafı istiqamətində ciddi işlər görülür. Aparılan sistemli islahatlar buna xidmət edir. Bütün bunlar onu deməyə əsas verir ki, yaxın gələcəkdə ölkə iqtisadiyyatında artım tempi davamlı olacaq. Bu da, öz növbəsində, inflyasiyanın cilovlanmasına gətirib çıxaracaq". Vidadi ORDAHALLI
