Rəşad Həsənov: "Yerli sektorun ixrac imkanlarının genişləndirilməsində əsasən müasir beynəlxalq standartlara uyğun məhsulun istehsalına diqqət artırılmalıdır"
İqtisadiyyatın bütün sahələrində olduğu kimi, yüngül sənayenin inkişafına da dövlət tərəfindən dəstək verilir. Artıq bu istiqamətdə müəyyən işlər görülür. Məlumatlara görə, Azərbaycan 5 inkişaf etmiş dövlətə köynək ixrac edəcək.
Qeyd edək ki, ölkəmizdə ixrac potensialı böyük olan müəssisələrdən biri də "Akkord Tekstil" MMC-dir. Cəmiyyət Azərbaycanda geyim istehsalı üzrə fəaliyyət göstərən ən böyük müəssisələrdən biridir. Fabrikdə əsasən kişi və qadın geyimləri, habelə digər təyinatlı uniformalar, uşaq və məktəbli geyimləri istehsal olunur.
MMC-nin direktoru İsmayıl Bayramov media nümayəndələrinə açıqlamasında qeyd edib ki, Ağstafa rayonunda fəaliyyət göstərən "Akkord" tikiş fabriki istər təchizat baxımından, istərsə də istehsal etdiyi məhsulun keyfiyyəti baxımından dünya standartlarına uyğundur: "Prezident İlham Əliyevin sahibkarlığın inkişafı ilə bağlı imzaladığı mühüm sərəncamlar, iqtisadiyyatımızın bütün sahələri kimi, tekstil sahəsinin də inkişafına təkan verib. Qəbul edilən qərar və qanunlar istehsalın daha da genişlənməsinə, yeni texnologiyaların tətbiqinə, məhsul çeşidinin artırılmasına, yeni iş yerlərinin açılmasına imkan yaradıb. Müəssisədə ayda 40 min ədəd köynək istehsalı mümkündür. İstehsal olunan köynəklər dünyanın bir çox ölkələrinə ixrac edilir. İtaliyada yerləşən "Elle-Elle" şirkəti ilə bu günlərdə yeni müqavilə imzalamışıq. Müqaviləyə əsasən, həmin şirkət bizdən "COVERY" markası altında "Made in Azerbaijan" yarlığı ilə 50 min ədəd köynək alacaq. Yaxın vaxtlarda müəssisəmizin istehsalı olan köynəklər İngiltərə, Fransa, Almaniya və Kanadaya da ixrac ediləcək".
Ekspertlərin fikrincə, Azərbaycan istehsalı olan köynəklərin inkişaf etmiş ölkələrə ixrac olunması bu sahənin inkişaf etməsinə səbəb olacaq.
İqtisadçı-ekspert Rəşad Həsənov "Bakı-Xəbər"ə açıqlamasında qeyd etdi ki, Azərbaycanda müqayisəli sektorlardan biri də yüngül sənayedir. Xüsusilə də xammal baxımından asılılıq olsa da, gələcəkdə hökumətin həyata keçirdiyi məlum siyasət bu asılılığı zəiflədəcək: "Bu baxımdan da istehsal olunan məhsulların ixracı mühüm məsələlərdən biridir. İnkişaf etmiş ölkələrə trikotaj məhsullarının ixrac olunması o deməkdir ki, istehsal olunan həmin köynəklər beynəlxalq standartlara uyğundur. Beynəlxalq standartlara uyğun məhsullar tək beş ölkənin deyil, bir çox ölkələrin bazarına çıxış imkanı əldə edəcək. Bu hal həm də "Made in Azerbaijan" brendinin reputasiyasına müsbət təsir göstərməklə, gələcəkdə tekstil sahəsinin inkişafına səbəb olacaq".
Həmsöhbətimizin sözlərinə görə, keyfiyyət standartı daim gözlənilməlidir. Çünki hazırda tekstil bazarında məhsulların rəqabətliliyi mühüm məqamlardan biridir: "Danılmaz faktdır ki, bu gün tekstil sahəsində kifayət qədər şirkət var. Onların istehsal etdikləri məhsulların, demək olar ki, əksəriyyəti yerli istehsaldan üstündür. Bu səbəbdən də yerli sektorun ixrac imkanlarının genişləndirilməsində əsasən müasir beynəlxalq standartlara uyğun məhsulun istehsalına diqqət artırılmalıdır".
Günel CƏLİLOVA
