Vahid Əhmədov: "Kimlər ki, pensiyaya çıxmaq istəyirdi, bu onlara..."
Xəbər verildiyi kimi, Azərbaycanda pensiya yaşı artırıldı. Prezident İlham Əliyev "Əmək pensiyaları haqqında" Azərbaycan Respublikasının Qanununda dəyişikliklər edilməsi barədə qanunu təsdiqləyib. Qanuna dəyişikliklər bu il martın 10-da Milli Məclis tərəfindən qəbul edilib. Qanun 2017-ci il iyulun 1-dən qüvvəyə minəcək.
Dəyişikliklər indiyə qədər pensiyaya çıxanlara şamil edilməyəcək.
Dəyişikliklərə əsasən, polis və hərbi qulluqçular istisna olmaqla, bütün peşə sahələri üzrə əmək pensiyasına görə yaş həddi artırılıb. Dövlət qulluqçuları üçün hazırda qüvvədə olan 15 təqvim ili 20 təqvim ilinə, prokurorlar üçün 25 təqvim ili 35 ilə, o cümlədən digər peşələr üçün də tələb olunan staj ili müvafiq olaraq 5 il qaldırılıb. Pensiya yaşı artırılaraq əmək pensiyaları üçün tələb olunan yaş hədləri ilə differensiallaşdırılıb. Bundan başqa, pensiyanın baza hissəsi ləğv edilib.
"Əmək pensiyaları haqqında" Qanuna edilən dəyişikliklərə əsasən, Azərbaycanda qadınların və kişilərin pensiya yaşı 65-ə çatdırılacaq. Layihəyə əsasən, kişilər üçün pensiya yaş həddi 2021-ci ilə qədər hər il 6 ay, qadınlar üçün isə 2027-ci ilə qədər hər il 6 ay artırılacaq. Bununla da qadınların və kişilərin pensiya yaşı həddi 65-ə çatdırılacaq.
Bütün bu deyilənlərin fonunda, ölkədə aparılan islahatlar çərçivəsində pensiya yaşının artırılmasına münasibət necədir?
"Əmək pensiyaları haqqında" Qanunda dəyişiklikləri şərh edən millət vəkili, iqtisadçı Vahid Əhmədov buna müsbət prizmadan yanaşır. O bunu müəyyən arqumentlərlə əsaslandırır: "Bu dəyişikliklər mühüm əhəmiyyət kəsb edir. Azərbaycanda pensiya yaş həddi artırılıb. Belə əsas gətirilir ki, ölkəmizdə orta yaş həddi yüksəkdir və bu da 77-78 yaş həddi edir. Ona görə də Azərbaycanda pensiya yaş həddinin artırılması normaldır. Bir çox ölkələrdə pensiya yaş həddi 60-67-dir. Kimlər ki, pensiyaya çıxmaq istəyirdi, bu onlara problem görünə bilər. Ancaq gələcəkdə bu problemlər də olmayacaq və hər şey qaydasına düşəcək. Statistikaya baxanda da görürük ki, Azərbaycanda yaş həddi 77-78 təşkil edir. Ona görə də bu, problem olmamalıdır".
Vidadi ORDAHALLI
