Bahadur Bilalov: "Oktyabr ayında daha təkmil formada növbəti festival keçiriləcək"
Ticarət festivallarının keçirilməsi ideyası bir çox ölkələr tərəfindən uğurla reallaşdırılır. Ticarət festivalının keçirilməsi, Azərbaycan mədəniyyətinin və digər ənənələrinin təqdimatı Bakını turistlər üçün daha da cəlbedici edir.
Qeyd edək ki, Türkiyə, Birləşmiş Ərəb Əmirliyi, Rusiya, Qazaxıstan və digər ölkələrdə də ticarət festivalları keçirilib. Sevindirici haldır ki, bu il Bakıda Şoppinq Festivalı təşkil olundu. Aprelin 10-dan start götürən festival mayın 10-na qədər davam edəcək. Müxtəlif ölkələrdən olan şoppinq həvəskarları hazırda Bakıya toplaşıb. Onlar böyük həvəslə bu festivaldan yararlanır.
Bakıda ilk dəfə keçirilən ticarət festivalına böyük maraq var. Tanınmış simalar Bakıda keçirilən Şoppinq Festivalından razı qaldıqlarını bildirir və bunun Azərbaycan brendinə çevriləcəyini düşünür.
Avropa İttifaqının Azərbaycandakı nümayəndəliyi rəhbərinin birinci müşaviri Denis Daniilidis festival haqqında müsbət fikirdədir. O, media nümayəndələrinə açıqlamasında qeyd edib ki, artıq bir brendə çevriləcək Bakı Şoppinq Festivalı öz xüsusi təklifləri və güzəştləri ilə Azərbaycan paytaxtını həm də tanınmış ticarət məkanı kimi məşhurlaşdıra bilər: "Hesab edirəm ki, mədəni tədbirlərin sayını artırmaqla, yerli və xarici dizaynerlərin, modelyerlərin şoppinq təklifləri ilə bu festivalın miqyasını daha da genişləndirmək olar".
D.Daniilidis hesab edir ki, Bakının Şərqlə Qərbin kəsişdiyi coğrafiyada yerləşməsi, həmçinin, şəhərdə çoxlu sayda Avropa brendlərinin mağazalarının mövcudluğu İran və körfəz ölkələrindən çoxlu sayda turisti cəlb edir. Amma avropalı turistlərin bu Şoppinq Festivalına diqqətini cəlb etmək mümkündür: "Bunun üçün bütün addımlar atılıb. Avropa qitəsi ilə yüksək səviyyəli hava rabitəsinin olması ilə yanaşı, "ASAN xidmət" vasitəsilə elektron vizaların əldə edilməsi avropalı turistlərin istirahət və şoppinq seçimlərini məhz Bakının xeyrinə etməsi üçün geniş imkanlar açır".
Bakıda keçirilən Şoppinq Festivalı Azərbaycanı ticarət məkanı kimi məşhurlaşdıra bilərmi? Turizm sahəsi üzrə mütəxəssis Bahadur Bilalov "Bakı-Xəbər"ə açıqlamasında qeyd etdi ki, Bakıda keçirilən ticarət festivalı alış-veriş həvəskarlarını paytaxta cəlb edir: "Məlumat üçün bildirim ki, turizmin bir neçə növü var. Şoppinq də turizmin bir növünə aiddir. Şoppinqsevərlər Bakıya gələrək alış-verişdən yararlanır".
Həmsöhbətimizin sözlərinə görə, növbəti Şoppinq Festivalı oktyabr ayında keçiriləcək: "Təşkilatçılar nəticəni müzakirə edəndən sonra oktyabr ayında daha təkmil formada növbəti ticarət festivalı keçiriləcək".
B.Bilalov onu da qeyd etdi ki, Bakıda keçirilən Şoppinq Festivalından çoxlu sayda insan faydalanıb. Bunu açıqlanan statistika da təsdiq edir: "Belə bir nəticə Azərbaycanın ticarət ölkəsinə çevrilməsi deməkdir".
Günel CƏLİLOVA
