Əli Əlirzayev: "Qoyulan vəsaitlərdən daha səmərəli istifadə etmək vacib faktorlardan biridir"
BMT-nin İqtisadi-sosial komissiyası ortamüddətli dövrdə Azərbaycanda iqtisadi artımın müsbət dinamika nümayiş etdirəcəyini proqnozlaşdırır. Bununla bağlı komissiyanın hesabatında qeyd olunur ki, BMT 2017-ci ildə Azərbaycanda ümumdaxili məhsul istehsalının 0,2 %, 2018-ci ildə isə 1,2 % artacağını güman edir.
Komissiyanın ekspertləri hesab edir ki, iqtisadi artım inflyasiyanın azalması ilə müşahidə olunacaq. O cümlədən, bu bir sıra arqumentlərlə əsaslandırılır: "Lakin 2017 və 2018-ci illər üçün müvafiq olaraq proqnozlaşdırılan 7,9 % və 5,8 % göstəriciləri sonuncu dəfə proqnozlaşdırılan rəqəmdən daha yüksəkdir".
Ekspertlərin proqnozuna əsasən, dünya bazarlarında neftin bahalaşması ölkənin iqtisadi vəziyyətinin yaxşılaşmasına səbəb olacaq. Buna baxmayaraq, BMT-nin ekspertləri hesab edir ki, ölkədə fiskal gərginlik qeyri-neft sektorundakı iqtisadi aktivliyi azalda bilər. "Ümumilikdə, bazarın zəif inkişafı və makroiqtisadi siyasətin əlverişliliyinin məhdud olması iqtisadiyyatın şoklara davamlılığını azaltmaqda davam edir", - deyə hesabatda qeyd olunub.
Bütün bu deyilənlərə ekspertlərin münasibəti necədir?
Məsələyə münasibət bildirən iqtisadçı-alim Əli Əlirzayevin sözlərinə görə, iqtisadi artımın kökündə bir sıra amillər dayanır: "Dünyada gedən iqtisadi proseslərə uyğun olaraq proqnozlar verilir. Ümumən görünən odur ki, dünyada iqtisadi artım azalır. Dünya iqtisadiyyatında gedən proseslər Azərbaycana da təsirsiz ötüşmür. Azərbaycanda iqtisadi artım azalsa da, ümumi artım, mütləq mənada, əvvəlkinə nisbətən çox oldu. Hesab edirəm ki, ölkə iqtisadiyyatında keyfiyyət baxımından artımlar olacaq. Burada söhbət həm də keyfiyyətin dəyişməsindən gedir. Yəni keyfiyyət artımı nəzərdə tutulur. İnflyasiyanın artması ilə ola bilər ki, ÜDM-in artım tempi təmin olunsun. Ancaq əsas real iqtisadiyyatda alıcılıq qabiliyyəti, istehlak səbəti artmaya bilər. Ona görə də bu baxımdan biz indi iqtisadiyyatın artmasında keyfiyyətə daha çox fikir verməliyik. Daha çox keyfiyyətin dəyişməsinə, struktur siyasətə, innovasiyalı istehsalata, intensiv amillərə üstünlük verməliyik. Məsələ ondadır ki, daxili resurslardan maksimum səmərəli istifadə etmək lazımdır. Ölkədə iqtisadi artım real olmalıdır. Qoyulan vəsaitlərdən daha səmərəli istifadə etmək vacib faktorlardan biridir. Bu minvalla, ölkədə dayanıqlı iqtisadi inkişafa nail olmaq mümkündür".
Vidadi ORDAHALLI
