Xəyal Məmmədxanlı: "İşsizlik sığortasının sosial durumu ağır olan ailələrə müsbət təsiri olar"
"İşsizlik sığortası ilə bağlı qanun layihəsi ölkə Prezidenti tərəfindən Milli Məclisə göndərilib". Bunu əmək və əhalinin sosial müdafiəsi naziri Səlim Müslümov bildirib.
Nazirin sözlərinə görə, Milli Məclisin yaz sessiyasında bu layihəyə 1-ci oxunuşda baxıla bilər: "Çünki biz Milli Məclisin İqtisadi siyasət, sənaye və sahibkarlıq komitəsinin sədri Ziyad Səmədzadə ilə bu barədə artıq danışmışıq. Mayın sonu- iyunun əvvəlində bu məsələlərin Milli Məclisdə ilk oxunuşa çıxarılması nəzərdə tutulub. İkinci və üçüncü oxunuşlar Milli Məclisin payız sessiyasında baş tuta bilər. Çünki qanun layihəsinin qüvvəyə minməsi kimi 1 yanvar 2018-ci il tarixi göstərilib. Müəssisənin ləğvi ilə bağlı işçilərin işdən azad olunması, ixtisarı ilə bağlı məsələlər var. Bu halda, Əmək Məcəlləsinin 72, 79 və 70-ci maddələri arasında bağlılıq və ya ziddiyyətlərin həmin qanunla tənzimlənməsi nəzərdə tutulur. Bütün bu məsələlərin müvafiq kontekstdə, yəni həm işəgötürənlərin, həm dövlət orqanlarının, həm də həmkarlar ittifaqlarının baxış bucağından müzakirə edilərək ümumi fikrə gəlinməsi nəzərdə tutulur".
Mövzu ilə bağlı danışan sığorta sahəsi üzrə ekspert Xəyal Məmmədxanlı qeyd etdi ki, dünyanın əksər ölkələrində işsizlik sığortası sosial sığorta sisteminin tərkib hissəsi kimi yox, özəl bir sığorta növü kimi həyata keçirilir: "Vətəndaş işlədiyi müddət ərzində sosial sığortaya müəyyən məbləğdə pul ödəyir. İşləmədiyi dövrdə vətəndaş ilk müddət iş axtarmalıdır. İş üçün müraciət etdiyi təşkilat və ya qurumlardan müsbət cavab ala bilməyəndə, o, işsizlik sığortasından yararlanır. Yeni iş tapana qədər vətəndaş adıçəkilən sığorta növündən istifadə edir".
Ekspertin sözlərinə görə, ölkəmizdə işsizlik sığortasının tətbiq edilməsi vacibdir: "Bunun əhəmiyyəti ondan ibarətdir ki, işsizlik dövründə işçinin sığortası onun xərclərini bağlamış olur. Amma işsizlik sığortasının tətbiq edilməsi ilə əlaqədar əvvəla qanunvericilik bazasının möhkəmləndirilməsinə ehtiyac var".
Həmsöhbətimizin fikrincə, belə bir qanun qəbul edilsə, bunun sosial durumu ağır olan ailələrə müsbət təsiri olar.
Günel CƏLİLOVA
