Nüsrət İbrahimli: "Sevindirici haldır ki, bu gün Azərbaycanda neft sektorundan sonra daha çox investisiya məhz tikinti sahəsinə ayrılır"
"Azərbaycanda tikinti sektoru neft sektorundan sonra ikinci sahədir ki, bura daha çox investisiya qoyulub". Bunu tikinti sektoru nümayəndələri ilə görüşdə baş nazirin müavini, hakim Yeni Azərbaycan Partiyası sədrinin müavini - icra katibi Əli Əhmədov deyib. Onun sözlərinə görə, tikinti sektoru əmək bazarında əhəmiyyətli yer tutur.
Baş nazirin müavini bildirib ki, 2016-cı ildə ölkə iqtisadiyyatına yatırılmış 15 milyard manat investisiyanın 11,4 milyard manatı tikinti sektoruna yönəldilib.
Ekspertlərin fikrincə, tikinti sektoruna investisiyanın çox yatırılması bu sahənin daha da inkişaf etməsinə səbəb olacaq.
Daşınmaz əmlak sahəsi üzrə ekspert Nüsrət İbrahimli "Bakı-Xəbər"ə açıqlamasında qeyd etdi ki, tikinti sektoru iqtisadiyyatın aparıcı seqmentlərindən biridir. Bu səbəbdən bu sahəyə daha çox diqqət ayrılır. Tikinti sektoruna investiya yatırılması üçün daha çox şərait yaradılır: "Sevindirici haldır ki, bu gün Azərbaycanda neft sektorundan sonra daha çox investisiya məhz tikinti sahəsinə ayrılır. Tikinti sektorunun inkişafı əhəmiyyətlidir. Bu sahənin daha da inkişaf etməsinə böyük ehtiyac var".
Həmsöhbətimiz bildirdi ki, tikinti sektorunun inkişafı ölkənin inkişafı deməkdir: "Hər halda, inşaat sektorunun inkişaf etdirilməsi ölkənin inkişafına hesablanmış böyük bir proqramın tərkib hissəsidir. Belə ki, bu proqram bir neçə il öncə hazırlanmışdı. Tikinti sektorunun canlandırılması məsələsi bir-beş ilin layihəsi deyil. Bu istiqamətdə qarşıya qoyulan məqsədlərə çatmaq üçün müəyyən vaxt lazımdır. Xatırladım ki, Prezident İlham Əliyev öz çıxışında qeyd edib ki, tikinti sektorunda durğunluq olmayacaq, yaxın 10-15 ildə bu sahə daim inkişaf edəcək, burada daim müxtəlif işlər görüləcək. İşin olması isə o deməkdir ki, iş yerləri olacaq, insanların məşğuliyyəti olacaq. Nəticədə bir tərəfdən şəhərimiz daha da inkişaf edəcək, həm də yeni iş yerləri yaranacaq".
Günel CƏLİLOVA
