Fikrət Sadıqov: "Diplomatik rütbə imkan verəcək ki, bu istiqamətdə daha yüksək səviyyəli məmurlarla danışıqlar aparılsın və..."
Azərbaycanın xarici ölkələrdəki səfirlik və konsulluqlarındakı ticarət nümayəndələrinə elçi diplomatik rütbəsi verilir. Bununla bağlı "Diplomatik xidmət haqqında" Qanunun 9-cu (Diplomatik rütbələrin verilməsi qaydaları) maddəsinə əlavə bənd salınır.
Əlavəyə əsasən, Azərbaycan Respublikasının xarici ölkələrdə fəaliyyət göstərən səfirlik və konsulluqlarında ticarət nümayəndələrinə bu maddənin birinci cümləsində nəzərdə tutulmuş qaydada (Konstitusiyanın 109-cu maddəsinin 24-cü bəndinə uyğun qayda) ikinci dərəcəli fövqəladə və səlahiyyətli elçi diplomatik rütbəsi verilir. "Pasportlar haqqında" Qanuna edilən əlavəyə görə, ticarət nümayəndələri diplomatik pasportla da təmin olunacaq.
Layihə Milli Məclisin plenar iclasına tövsiyə olunub və mayın 2-də müzakirəyə çıxarılacaq.
Məlumat üçün qeyd edək ki, ötən il prezident xarici ölkələrdə ölkəmizin və yerli ixracatçıların iqtisadi-ticarət maraqlarının daha dolğun qorunması və təmsil edilməsi, yerli məhsulların xarici ölkələrin bazarlarına çıxışının genişləndirilməsi, ixracın stimullaşdırılması ilə bağlı tədbirlərin tətbiqində səmərəliliyin və təsərrüfat subyektləri arasında işgüzar əlaqələrin qurulmasında çevikliyin artırılması məqsədilə "Azərbaycan Respublikasının xarici ölkələrdə fəaliyyət göstərən səfirlik və konsulluqlarında ticarət nümayəndələrinin təyin edilməsi haqqında" Fərman imzalayıb. Bütövlükdə, ticarət nümayəndələrinə elçi diplomatik rütbəsinin verilməsi bu sahəyə nə verəcək? Bu hansı üstünlükləri özündə ehtiva edir?
Sözügedən məsələyə aydınlıq gətirən keçmiş diplomat, politoloq Fikrət Sadıqovun sözlərinə görə, bunun bir sıra üstünlükləri var: "Bu onların statusunu yüksəldir və daha rahat işləməyə şərait yaradır. Yəni onlar daha yuxarı səviyyəli status alandan sonra bir sıra yuxarı rütbəli dairələrlə danışıqlar apara, müxtəlif sazişlərin imzalanmasına təkan verə, imkan yarada bilər. Bu özlüyündə çox müsbət, aktual amildir. Çünki ticarət nümayəndəsinin səfirlikdə funksiyaları çoxdur. İndiki dövrdə bizim bir sıra ölkələrlə iqtisadi-ticarət münasibətlərini inkişaf etdirməyimizi nəzərə alsaq, bunun əhəmiyyəti böyükdür. Xüsusən də Azərbaycan istehsalı olan məhsulların bir sıra ölkələrə ixrac olunmasında həmin nümayəndəliklərin rolu artacaq. Diplomatik rütbə imkan verəcək ki, bu istiqamətdə daha yüksək səviyyəli məmurlarla danışıqlar aparılsın və görülən işlər tezləşdirilsin. Yəni ticarət müqavilələrinin bağlanması yubanmasın və s. Ən başlıcası, bu, Azərbaycan məhsullarının təbliğində böyük imkanlar yaradacaq".
Vidadi ORDAHALLI
