Müslüm İbrahimov: "Ticarət sahəsi üzrə məsul olan şəxslərin bu tip festivallarda fəal iştirak etməsi Azərbaycan sahibkarlarının xarici bazara çıxmasına şərait yaradır"
Vahid Əhmədov: "Hazırda Azərbaycanda qeyri-neft sektorunda ciddi irəliləyişlər nəzərdə tutulub və bu proses davam etdirilir"
Azərbaycanlı sahibkarlar istehsal etdikləri istənilən məhsulu rahat şəkildə xarici bazarlara çıxara bilər. Azərbaycanlı sahibkarların dünya bazarına çıxması zaman-zaman müzakirə mövzusuna çevrilib. Elə bu yaxınlarda Prezident İlham Əliyev qeyri-neft ixracatçılarının Yevlaxda keçirilən respublika müşavirəsində bildirib ki, sahibkarların qonşu ölkələrin bazarlarına və ya hər hansı bir bazara çıxış əldə etməsi üçün heç bir əngəl yoxdur.
Bəllidir ki, hazırda ölkəmizdə Bakı Şoppinq Festivalı keçirilir. Həmin ticarət festivalında sahibkarların müxtəlif adda istehsal etdikləri məhsullar satışa çıxarılır.
Maraqlıdır, Bakı Şoppinq Festivalı azərbaycanlı sahibkarların dünya bazarına çıxmasına şərait yarada bilərmi?
İqtisad elmlər doktoru Müslüm İbrahimov "Bakı-Xəbər"ə açıqlamasında qeyd etdi ki, bir sıra xarici ölkələrdə şoppinq festivalları keçirilir. Həmin festivallarda yerli sahibkarlar öz məhsullarını satışa çıxarır. Festivallar sayəsində sahibkarların məhsullarına xarici bazarda tələbat yaranır.
Həmsöhbətimizin sözlərinə görə, nəinki Şoppinq Festivalı, həmçinin, ölkəmizdə keçirilən müxtəlif formatda beynəlxalq tədbirlər sayəsində Azərbaycan məhsullarına xarici bazarda tələbat yaranır: "Ticarət sahəsi üzrə məsul olan şəxslərin bu tip festivallarda fəal iştirak etməsi Azərbaycan sahibkarlarının xarici bazara çıxmasına şərait yaradır".
M.İbrahimovun fikrincə, xarici ölkələrdə fəaliyyət göstərən Azərbaycan ticarət evləri həmin yerdə hansı məhsula tələbatın olmasını araşdırıb yerli sahibkarlara məlumat verməlidir: "Bu, marketinq tədqiqatının həyata keçirildiyi sahədir. Xaricilərin Azərbaycan məhsullarını adaptasiyası da önəmlidir. Ticarət Festivalı və ya müxtəlif formatlı tədbirlər sayəsində əcnəbilər Azərbaycan məhsuluna rahat şəkildə uyğunlaşır".
Müsahibimiz onu da əlavə etdi ki, Bakı Şoppinq Festivalının keçirilməsinin məqsədi tək insanları cəlb etmək deyil, həmçinin, iqtisadi nəticələr əldə etməkdir.
Millət vəkili Vahid Əhmədovun sözlərinə görə, bu vaxta qədər Azərbaycan sahibkarları xarici bazarlara alkaqollu içkilər və kənd təsərrüfatı məhsulları ilə çıxırdılar: "Hazırda Azərbaycanda qeyri-neft sektorunda ciddi irəliləyişlər nəzərdə tutulub. Bu proses davam etdirilir. Məhsullarımız Türkmənistan, Qazaxıstan, Qırğızıstana və digər dövlətlərə ixrac olunur. Bizdə kənd təsərrüfatı mallarının ixracında ciddi problemlər yoxdur. Amma onun xarici görünüşü, qablaşdırılması bizim üçün əhəmiyyət kəsb edir. Vaxtilə Azərbaycan 30 dövlətə neft maşınqayırma məhsulları ixrac edirdi. Ancaq hazırda zavodlar fəaliyyət göstərmir deyə, biz bu məhsulları idxal edirik. Bununla əlaqədar Rusiya və digər ölkələrlə birgə müəssisələr yaratmaq barədə danışıqlar aparılır. İmkanımız böyükdür və bu sahədə iş görmək lazımdır".
Günel CƏLİLOVA
