Bahadur Bilalov: "Halal standartının tətbiqindən sonra islam ölkələrindən gələn turistlərin sayında artım qeydə alınacaq"
Müzəffər Ağakərimov: "Halal standartının tətbiqi həm İslam Həmrəyliyi Oyunları zamanı özünü göstərəcək, həm də ölkəmizə digər ölkələrdən gəlmək istəyən turistlərin maraqlarını təmin edəcək"
Artıq Azərbaycan turizm ölkəsinə çevrilir. Ölkəmizə istirahət üçün gələn əcnəbilərin sayı ildən-ilə artır. Əcnəbilər arasında islam ölkələrinin vətəndaşları üstünlük təşkil edir.
Açıqlanan statistik rəqəmlərə əsasən, 2015-ci illə müqayisədə ötən il Azərbaycana İordaniyadan 2, Küveytdən 3,2, Qətərdən 5,5, Səudiyyə Ərəbistanı və Omandan 10, Birləşmiş Ərəb Əmirliklərindən 22, İraqdan isə 30 dəfə çox turist gəlib. Təkcə bu il Novruz bayramı münasibətilə İrandan gələn turistlərin sayı 70 minədək artıb.
Bu göstəricilər əksər inkişaf etmiş müsəlman ölkələrində tətbiq edilən halal turizm modelinin istifadə edilməsini qaçılmaz edib. Bu məqsədlə ölkəmizdə fəaliyyət göstərən otellər üçün halal standartı yaradılıb.
Halal standartının tətbiq edilməsi otelə müsəlman olmayan insanların gəlməsini qadağan etmir. Sadəcə olaraq bu standartın tətbiqi məhz müsəlman ölkələrindən gələn turistləri cəlb etmək məqsədi daşıyır. Halal standartını almış otellərdə islam dininin qayda-qanunları nəzərə alınır.
Halal standartının tətbiq edilməsi islam ölkələrindən daha çox turistin gəlməsinə səbəb ola bilərmi?
Turizm sahəsi üzrə ekspert Bahadur Bilalov "Bakı-Xəbər"ə açıqlamasında qeyd etdi ki, son illər əksər dünya ölkələrində halal standartından istifadə olunur. Əsas məqsəd isə islam ölkələrindən turist cəlb etməkdir: "Zənnimcə, Azərbaycan haqlı olaraq bu məsələni göz önünə alaraq halal standartı qəbul edib. Belə bir standartın özünün xüsusi atributları var. Turpaketə nələrin daxil olması aydın şəkildə qeyd olunmalıdır ki, islam ölkələrindən gəlmək istəyən turistlərin diqqətini cəlb etsin".
Həmsöhbətimizin fikrincə, halal standartının tətbiqindən sonra islam ölkələrindən gələn turistlərin sayında artım qeydə alınacaq.
B.Bilalov onu da vurğuladı ki, halal standartı bütün otellərə şamil olunmayacaq. Adıçəkilən standartı tətbiq edən mehmanxanalar və turizm şirkəti sayəsində qatı mühafizəkar dindar turistləri ölkəmizə cəlb edə bilərik: "Çünki elə insan var ki, o yalnız halal formada kəsilmiş heyvanların ətindən yeyir, mehmanxana otaqlarında qiblənin işarəsini göstərən xüsusi cihaz və dini kitabımız olan Quranın olmasını arzu edir. Bu və digərləri halal standartında əks olunub".
Azərbaycan Turizm Assosiasiyası sədrinin müşaviri Müzəffər Ağakərimovun fikrincə, halal turizm modelinin yaradılması İslam Oyunlarında iştirak edəcək qonaqlar üçün müsbət şərait yaradacaq. Bu standartın tətbiqi gələcəkdə İslam dünyası ölkələrindən Azərbaycana gələcək turistlərin sayının artırılmasına səbəb ola bilər: "Halal turizm üçün islam qaydaları ilə restoranlarda qida təqdim olunması, mehmanxanalarda namaz otağı və digər şəraitin yaradılması mühüm amildir. Standartlaşdırma İnstitutu, Mədəniyyət və Turizm Nazirliyi, Azərbaycan Turizm Assosiasiyası bu sahədə də mühüm işlər görüb. Ekspertlər də halal standartının islam ölkələrindən gələn turistlərə təqdim olunması üçün bütün şəraitin yaradılmasına təminat verir. Azərbaycan tolerant ölkə olmaqla bərabər, həmçinin, müsəlman ölkəsidir. İslam Həmrəyliyi Oyunları da bu modelin yaradılmasına təkan verib. Bu baxımdan, belə bir modelin yaradılması ümumilikdə turizmin inkişafı üçün müsbət haldır".
Həmsöhbətimizin sözlərinə görə, halal standartının tətbiqi həm İslam Həmrəyliyi Oyunları zamanı özünü göstərəcək, həm də ölkəmizə digər ölkələrdən gəlmək istəyən turistlərin maraqlarını təmin edəcək: "O cümlədən ölkəmizə ilk dəfə gələn turistlər hər bir turistin zövqünə uyğun turizm növünün təşkil olunduğunu görəcək. Biz həm Qərb, həm də Şərqdən gələn insanların arzularına uyğun marşrutlar təklif etmək iqtidarındayıq".
Günel CƏLİLOVA
