İldırım Qurbanov: "Xarici ölkələrdə bizim məhsullara tələbatı reallaşdırmaq üçün..."
Məlum olduğu kimi, aprelin 10-dan Azərbaycanda ilk dəfə olaraq Bakı Ticarət Festivalı (Şoppinq Festivalı) keçirilir. Mayın 10-dək davam edəcək festival Prezident İlham Əliyevin 2016-cı il sentyabrın 1-də imzaladığı "Azərbaycan Respublikasında turizmin inkişafı ilə bağlı əlavə tədbirlər haqqında" Sərəncama uyğun olaraq keçirilir.
Ticarət festivallarının keçirilməsində məqsəd Azərbaycanın turizm və iqtisadi potensialının yüksəldilməsi, sahibkarlıq fəaliyyətinin təşviq edilməsi ilə ölkənin ticarət dövriyyəsinin artırılmasının stimullaşdırılmasıdır. Bu festivallar həm də vergi sisteminin təşviqini, fiziki şəxslər tərəfindən Azərbaycanın ərazisində alınmış istehsal, yaxud kommersiya məqsədləri üçün nəzərdə tutulmayan mallara görə ödənilmiş əlavə dəyər vergisinin qaytarılması (ƏDV) sisteminin ölkədə tətbiqi ilə vergi inzibatçılığının daha da təkmilləşdirilməsini, rezident və qeyri-rezident vergi ödəyicilərinin xidmət sisteminin inkişaf etdirilməsini nəzərdə tutur.
Festival başlayandan sonra ilk dəfə olaraq Azərbaycan vətəndaşları da "Tax-free" sistemindən bəhrələnə bilir. ƏDV-nin qaytarılması sisteminə qoşulmuş obyektlərin üzərində xüsusi "Baku Shopping Festival - Tax-free" stikeri yerləşdirilib. Bütövlükdə, festival sayəsində Azərbaycanda beynəlxalq brendlər arasında rəqabət daha da güclənəcək. Eyni zamanda, yerli və xarici alıcıların Azərbaycandakı ticarət mərkəzləri və mağazalara marağı artacaq. Festivalın ənənəvi olaraq hər il keçiriləcəyini nəzərə alsaq, bunun əhəmiyyəti daha böyükdür. Ötən 15 gün ərzində müşahidələr də göstərir ki, festivala maraq böyükdür.
Bütün bu deyilənlərin fonunda, Şoppinq Festivalı Azərbaycana xarici investisiya qoyuluşunun təşviqində necə rol oynayacaq?
Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert İldırım Qurbanovun sözlərinə görə, Şoppinq Festivalı Azərbaycana xarici sərmayənin cəlb olunmasında öz müsbət təsirini göstərəcək: "Belə festivallar, istər-istəməz, xarici sərmayədarların ölkə iqtisadiyyatına marağını artırır. Çünki bunun sayəsində onlar iqtisadiyyatın müxtəlif sektorları ilə tanış olur. Bu da, nəticə etibarilə, onları sərmayə qoymağa həvəsləndirir. Nəzərə almaq lazımdır ki, indiki şəraitdə Azərbaycanın xarici sərmayəyə ehtiyacı var. Xüsusən də qeyri-neft sektorunun inkişaf etdirilməsi baxımından bunun özünəməxsus əhəmiyyəti var. Bu günlərdə ölkə Prezidenti müşavirədə bildirdi ki, ölkədə sahibkarlığın inkişafı üçün bütün şərait yaradılıb. Bu istiqamətdə bundan sonra da bir sıra tədbirlər görüləcək. Ancaq gərək məhsullar ixracyönümlü olsun və dünya bazarında rəqabətə davam gətirsin. Xarici ölkələrdə bizim məhsullara tələbatı reallaşdırmaq üçün bütün bunlar vacib şərtlərdən biridir. Eyni zamanda, xarici bazarları araşdırmaq lazımdır. Yəni hansı ölkədə bizim məhsula daha çox tələbat var. Keyfiyyətli ixrac məhsulu bazara çıxara bilsək, o zaman alıcı sarıdan əziyyət çəkmərik. Ümumiyyətlə, bu kimi tədbirlərin keçirilməsi qeyri-neft sektorunun inkişafına xidmət edir. O baxımdan bundan biz maksimum səmərəli istifadə etməliyik".
Vidadi ORDAHALLI
