"Hətta elə mağazalar da var ki, onlar festival münasibətilə 70 faizədək endirim edib"
Bakı şəhəri beynəlxalq festivala ev sahibliyi edir. Bu il ilk dəfə keçirilən "Baku Shopping Festival" alış-veriş, əyləncə, moda və mədəniyyət sahələrini əhatə edir. Festival çərçivəsində şəhərin ticarət mərkəzlərində qonaqlara xüsusi endirimlər təklif olunmaqla yanaşı, müvəqqəti ticarət məkanlarında isə Azərbaycanın və bir sıra xarici ölkələrin brend ticarət nişanları geniş miqyasda təmsil olunur.
Ticarət festivalı barədə "Bakı-Xəbər"ə Azərbaycan Konqreslər Bürosu idarə heyətinin sədri Ülviyyə Mirqasımova müsahibə verdi.
- Ülviyyə xanım, aprelin 10-dan bu günə kimi Şoppinq Festivalına maraq hansı səviyyədədir?
- Festivala maraq yüksək səviyyədədir. Bakı Şoppinq Festivalı zamanı tətbiq edilən endirimlər və ƏDV-nin geri qaytarılması imkanı həm yerli əhalini, həm də turistləri alış-verişə həvəsləndirir. Festivalda iştirak edən mağazalara hər gün daha çox alıcı gəlir və bu da ticarət dövriyyəsinin artmasına səbəb olur.
- Turistlərin festivala münasibətini necə qiymətləndirirsiniz? Onlar festivalla bağlı hansı fikirdədir?
- Turistlər festival barədə müsbət fikirdədir. Bunu onların şoppinqə marağı göstərir. Endirimlər və "Tax-free" sistemi Bakıdakı qiymətlərin turistlərin öz ölkələrindən daha ucuz olmasına səbəb olur. Bu da, öz növbəsində, onları daha çox alış-veriş etməyə sövq edir. Turistlər böyük həvəslə ticarət festivalında iştirak edir.
- Təxminən nə qədər turist Şoppinq Festivalına qoşulub?
- Turistlərin festivala qoşulması barədə ətraflı məlumatlar tədbir başa çatdıqdan sonra yekun hesabatla ictimaiyyətə açıqlanacaq. Hələlik bu barədə dəqiq rəqəm demək mümkün deyil. Çünki Şoppinq Festivalına qoşulan turistlərin sayı günbəgün artır.
- Bizim üçün maraqlıdır, əcnəbi alıcılar daha çox şoppinqdə nəyə maraq göstərir? Onlar hansı növ məhsulları almağa həvəslidir?
- Bakı Şoppinq Festivalı müxtəlif profilli dükanları və çox geniş çeşidli məhsulların satışını əhatə edir. Alıcılar geyim, bijuteriya, parfumeriya, şirniyyat, elektron, məişət avadanlığı, mebel, dekor və digər malları festival şərtləri ilə almaq imkanından yararlanır. Turistlər də yaradılan bu imkanlardan maksimum istifadə etməyə çalışır.
- ƏDV-nin geri qaytarılması turistlərin marağına səbəb olurmu?
- Turistlərə ƏDV-nin qaytarılması, "Tax-free" sistemi hər zaman keçərlidir. Turistlər üçün "Tax-free" həddi 300 manatdan 100 manata salınıb. Yəni bundan sonra festival çərçivəsində turistlər də, yerli vətəndaşlar kimi, 100 manatdan yuxarı alış-veriş etdikdə ödədikləri məbləğin ƏDV-sini geri ala bilər. Turistlər "Tax-free" şərtlərindən yararlanmaqla yanaşı, bütün iştirakçı mağazaların 30 faizədək olan festival endirimlərindən faydalana bilir. Hətta elə mağazalar da var ki, onlar festival münasibətilə 70 faizədək endirim edib. Həmçinin, Bakı Şoppinq Festivalı daha çox obyektin "Tax-free" sisteminə qoşulmasına səbəb olub. Təbii ki, bütün bunlar turistlərin marağına səbəb olmaya bilməz. Hazırda müşahidə etdiyiniz turist axını da bunun əyani sübutudur. Digər tərəfdən, nəzərə alsaq ki, festival ölkəmizdə ilk dəfə keçirilir, deməli, təbliğ olunduqca, növbəti festivallara gələnlərin sayı indikindən də çox olacaq.
Günel CƏLİLOVA
