Natiq Cəfərli: "Bölgələrarası iqtisadi inteqrasiya bərpa olunmalıdır"
2017-ci il aprelin 1-i vəziyyətinə hüquqi şəxs yaratmadan sahibkarlıq fəaliyyəti ilə məşğul olmaq üçün qeydiyyatdan keçmiş fərdi sahibkarların sayı 757 minə yaxınlaşıb.
Dövlət Statistika Komitəsinin təqdim etdiyi statistikaya əsasən, hesabat dövründə hər altı fərdi sahibkardan beşi "Ticarət, nəqliyyat vasitələrinin təmiri", "Kənd təsərrüfatı, meşə təsərrüfatı və balıqçılıq", "Digər sahələrdə xidmətlərin göstərilməsi" və "Nəqliyyat və anbar təsərrüfatı" sahələri üzrə qeydiyyatdan keçib.
Sahibkarlıqla məşğul olmaq niyyətində olan fərdi sahibkarların əsas hissəsi Bakıda (28,7 %), Aran (21 %), Gəncə-Qazax (14,7 %) və Lənkəran (10,3 %) iqtisadi rayonlarında qeydiyyata alınıb.
Qeyd edək ki, sahibkarlıqla məşğul olan fərdi sahibkarların 78,3 %-ni kişilər, 21,7 %-ni isə qadınlar təşkil edib.
Məsələ ilə bağlı fikir bildirən iqtisadçı-ekspert Natiq Cəfərli "Bakı-Xəbər"ə açıqlamasında qeyd etdi ki, Bakı bütün göstəricilər üzrə liderliyini qoruyur. Çünki ölkənin iqtisadi aktivliyinin böyük əksəriyyəti Bakı və Abşeron rayonunda cəmləşib: "Ümumdaxili məhsulun 85 faizdən çoxu Bakı və Abşeron rayonunda yaradılırsa, xarici ticarətin 90 faizindən yuxarısı paytaxtın payına düşürsə, bütün göstəricilərdə Bakı öz liderliyini qoruyacaq. Bu isə yaxşı bir hal deyil. Digər bölgələrin iqtisadi göstəricilərinə mənfi təsir göstərir".
Bakıdan savayı digər bölgələrdə sahibkarlığın inkişafına gəlincə, həmsöhbətimiz bunun əhali sayı, sərhədlərə yaxın yerləşmə ilə bağlı olduğunu dilə gətirdi: "Gəncə-Qazax zonası Gürcüstana yaxın olduğu üçün, bu ərazidə iqtisadi inkişafın olması təbiidir. Təkcə Lənkəran şəhəri yox, bütün cənub bölgəsi İranla iqtisadi münasibətlərdə mühüm rol oynayır. Bu kimi faktorlar bölgələrdə sahibkarlığın inkişafına təsir göstərir. Bu o deməkdir ki, şimal zonası Rusiya, cənub İran, şimal-qərb Gürcüstanla sərhəd olduğu üçün, həmin bölgələrdə iqtisadi aktivlik qeydə alınır. Ancaq ölkədaxili iqtisadi aktivliyin qeydə alınmaması təəssüf doğurur. Məsələn, Lənkəranın Gəncə ilə iqtisadi münasibətləri çox aşağı səviyyədədir. Bölgələrarası iqtisadi inteqrasiya bərpa olunmalıdır".
Günel CƏLİLOVA
