Zakir Əhmədov: "Belə strukturların olması ölkədə sahibkarlığın inkişafı ilə bağlı..."
Azərbaycanda sahibkarlığın inkişafı üçün dövlət tərəfindən sistemli olaraq zaman-zaman tədbirlər görülür. Vergi sistemi sadələşdirilir, səhibkarlıq fəaliyyəti üçün tələb olunan sənədlərin sayı azaldılır və digər tədbirlər görülür.
Bu arada əldə etdiyiiz məlumata görə, Azərbaycanda Kiçik və Orta Sahibkarlıq Agentliyinin yaradılması ilə bağlı müzakirələr aparılır. Artıq müvafiq qurumlar tərəfindən agentliyin yaradılması istiqamətində tədbirlər də görülür. Eyni zamanda, agentliyin yaradılması üçün xarici ekspertlərin iştirakı ilə araşdırmalar aparılır. Belə ki, Almaniya, Cənubi Koreya və Türkiyə modelləri mövcuddur. Agentlik fəaliyyətə başlamaqla kiçik və orta sahibkarlıq sahəsində institusional baxımdan dövlət siyasətinin daha da təkmilləşdirilməsini təmin edəcək. Hazırda müvafiq dövlət qurumları agentliyin yaradılması istiqamətində iş aparır. Belə institusional strukturun yaradılması kiçik və orta sahibkarlıq sahəsində dövlət siyasətinin təkmilləşdirilməsinə və dövlət xərclərinin azalmasına xidmət edəcək.
Maraqlıdır, bəs ekspertlərin sözügedən agentliyin yaradılmasından gözləntiləri nədən ibarətdir? Məsələyə münasibət bildirən ekspert Zakir Əhmədovun sözlərinə görə, sözügedən qurum sahibkarların üzləşdiyi çətinliklərin daha dolğun araşdırılmasına və bu yöndə lazım olan tövsiyələrin verilməsinə imkan yaradacaq: "Kiçik və Orta Sahibkarlıq Agentliyinin yaradılması bu sahədə dövlət tənzimlənməsinin daha yaxşı təşkil olunmasına öz müsbət təsirini göstərəcək. Bu qurum vasitəsilə sahibkarların hansı çətinliklərlə üzləşməsini, bunu necə aradan qaldırmağın yollarını tez və optimal şəkildə müəyyən etmək olar. Bəzən qanunvericilikdə olan hansısa boşluq sahibkarların fəaliyyətinə maneələr törədir. Hesab edirəm ki, agentlik bu işin həllində, qanunvericiliyin təkmilləşdirilməsində orbitr rolunu oynaya bilər. Çünki belə strukturların olması ölkədə sahibkarlığın inkişafı ilə bağlı daha çevik və rasional siyasətin yeridilməsinə öz töhfəsini verir".
Vidadi ORDAHALLI
