Məhərrəm Zülfüqarlı: "Təklif artdıqca, istər-istəməz, mehmanxanalar arasında rəqabət genişlənəcək və qiymətlər düşəcək"
Azərbaycanda özəl çoxmənzilli yaşayış sahələrinin və yaşayış evlərinin mehmanxana və ya mehmanxana tipli obyekt kimi istifadə edilməsi asanlaşır. Belə ki, bu barədə məsələ Mənzil Məcəlləsinə təklif edilən dəyişiklikdə öz əksini tapıb.
Dəyişikliyə əsasən, mehmanxana, mehmanxana tipli obyektlər və müvəqqəti yaşayış üçün nəzərdə tutulan digər tikinti obyektləri "yerləşmə vasitələri" adlandırılır və statusuna görə yaşayış sahəsi hesab edilir. Nəticədə özəl mənzil fonduna aid çoxmənzilli yaşayış sahələrinin və yaşayış evlərinin mülkiyyətçi tərəfindən "yerləşmə vasitəsi" kimi istifadəsi üçün heç bir prosedur qaydası (yaşayış sahəsinin qeyri-yaşayış sahəsinə keçirilməsi) tələb olunmayacaq.
Heç şübhəsiz ki, bu dəyişiklik insanlara öz yaşayış evlərindən daha asan şəkildə mehmanxana və ya hostel kimi istifadə etməsi üçün şərait yaradır. Çünki hazırkı qanunvericiliyə əsasən, yaşayış sahəsinin qeyri-yaşayış sahəsinə keçirilməsi üçün müvafiq icra hakimiyyəti orqanından icazə almalısan. Ancaq dəyişiklikdən sonra mehmanxanalar yaşayış kateqoriyasına aid ediləcəyi üçün, buna ehtiyac qalmır. Yəni hazırkı qanunvericiliyə əsasən, mehmanxanalar qeyri-yaşayış kateqoriyasına aid edilir. Dəyişiklikdən sonra isə mehmanxanalar yaşayış kateqoriyasına aid ediləcək. İnsanlar yaşayış evlərini alıb kiçik hostellər edirlər və onun üçün müvafiq icra hakimiyyətinə müraciət olunmalıdır. Bu dəyişiklik Mənzil Məcəlləsinə ona görə edilir ki, icra hakimiyyətinə müraciət etməyə ehtiyac qalmasın, insanlar bunun üçün get-gələ düşməsin.
Onu da qeyd edək ki, ölkədə yeni turizm mövsümü başlamaq üzrədir. Demək olar ki, artıq ölkənin bir çox bölgələrində istirahət mərkəzləri qapılarını qonaqlarının üzünə açıb. Paytaxtda və digər turist zonalarında yüksək xidmət səviyyəsinə malik mehmanxanalar artdığı üçün, ölkəyə turist axını da artır. Hazırda ölkədə 600-dən çox mehmanxana və mehmanxana tipli gecələmə yeri var. Ancaq qiymətlər çox bahadır. Bunun səbəblərindən biri mehmanxanaların sayının az olmasıdır. Maraqlıdır, yaşayış evlərinin mehmanxana tipli obyekt kimi istifadə edilməsinin asanlaşdırılması bu sahədə qiymətlərə nə kimi təsir göstərəcək?
Məsələyə münasibət bildirən ekspert Məhərrəm Zülfüqarlının sözlərinə görə, bu qərar ölkədə turizmin inkişafına əlavə stimul verə bilər: "Mehmanxalarda qiymətlərin nisbətən aşağı düşməsi baxımından belə bir addımın atılması zəruri idi. Onsuz da kənd turizminin inkişaf etdirilməsində evlərin kirayəyə verilməsi təcrübəsi var. Ancaq onu da nəzərə almaq lazımdır ki, Azərbaycanda turizm inkişaf etdikcə, evlər beynəlxalq standartlara uyğun olandan sonra bu cür kirayəyə vermək mümkündür. Bütün hallarda, belə bir qərarın verilməsi müsbət haldır və ölkədə turizmin inkişafına yaxşı təsir göstərəcək. Çünki təklif artdıqca, istər-istəməz, mehmanxanalar arasında rəqabət genişlənəcək. Bu da, nəticə etibarilə, qiymətlərin düşməsinə və ölkəyə daha çox turist gəlməsinə gətirib çıxaracaq. Ancaq yerli məmurlar, bəzi qurumlar buna müdaxilə edir və belə obyektlərin işləməsinə imkan vermir. Hesab edirəm ki, bunların da qarşısı alınsa, o zaman bunun effekti daha böyük olacaq".
Vidadi ORDAHALLI
