Zakir Əhmədov: "Zaman-zaman erməni mətbuatı Azərbaycan barəsində həqiqətə uyğun olmayan informasiyalar yayaraq ictimai rəyi aldatmağa çalışıb"
Erməni saytları, hər zaman olduğu kimi, bu dəfə də Azərbaycan barəsində qərəzli, məntiqsiz, ciddi əsaslara malik olmayan məlumatlar yaymaqdadır. Onların iddiasına görə, guya Dünya Bankı Azərbaycan barəsində bədbin proqnoz verib və Azərbaycan iqtisadiyyatının 2017-ci ildə tənəzzül yaşayacağını bildirib.
Halbuki, Azərbaycan iqtisadiyyatının bu il üçün göstəriciləri fərqlidir. Bunu birinci rübün göstəriciləri də təsdiqləyir. Məsələ ondadır ki, bu ildən iqtisadiyyatda artım tendensiyası özünü göstərir. Ölkə iqtisadiyyatında azalma tendensiyası ötən il özünü göstərdi. Bunun da bir sıra obyektiv səbəbləri vardı. Ancaq Azərbaycanda həyata keçirilən islahatlar və aparılan məqsədyönlü siyasət fərqli mənzərə ortaya qoyub. Görülən işlərin nəticəsidir ki, artım daha çox iqtisadiyyatın qeyri-neft sektorunda özünü göstərir.
Digər tərəfdən, əslində, Dünya Bankının Azərbaycanla bağlı proqnozu elə deyil. Proqnoza əsasən, 2017-ci ildə Azərbaycanda orta illik inflyasiya 5 faizədək azalacaq. Halbuki, bankın hesabatına əsasən, 2016-cı ildə Azərbaycanda orta illik inflyasiya 12,6 % təşkil edib. DB bildirir ki, bu il orta illik inflyasiyanın azalmasına bazardakı məhdud likvidlik səbəb olacaq. Bununla yanaşı, hökumət makroiqtisadi sabitliyi təmin etmək üçün sərt fiskal və monetar siyasətə üstünlük verməkdə davam edəcək. Ən nəhayət, 2017-2019-cu illərdə ölkənin fiskal mövqeyi ciddi şəkildə yaxşılaşacaq. Proqnoz belə verildiyi halda, erməni mətbuatının bunu tam fərqli formada təqdim etməkdə məqsədi nədir? Məsələyə münasibət bildirən ekspert Zakir Əhmədovun sözlərinə görə, məqsəd Azərbaycan barəsində mənfi rəy yaratmaqdır: "Zaman-zaman Ermənistan mətbuatı Azərbaycan barəsində həqiqətə uyğun olmayan informasiyalar yayaraq ictimai rəyi aldatmağa çalışıb. Əslində, burada yeni bir şey yoxdur. Cənubi Qafqazda Ermənistan yeganə dövlətdir ki, iqtisadiyyatı bərbad vəziyyətdədir. İqtisadi vəziyyətin acınacaqlı durumda olması səbəbindən demoqrafiq vəziyyət çox pisdir. İlbəil ölkəni tərk edənlərin sayı artır. Xüsusən də əmək qabiliyyətli vətəndaşların ölkəni tərk etməsi Ermənistandakı vəziyyəti daha da dramatikləşdirir. Azərbaycanda isə həm əhalinin sayı artır, həm də makroiqtisadi vəziyyət hər keçən gün müsbətə doğru dəyişir. Aparılan iqtisadi islahatların miqyası isə get-gedə genişlənir. Bu da erməniləri narahat edir. O üzdən, onlar Azərbaycan barəsində təhrif olunmuş informasiyalar yayır". Vidadi ORDAHALLI
