Özbəkistanda Azərbaycanın turizm məkanlarına maraq göstərənlərin sayı xeyli artıb, Bakı Ticarət Festivalı isə xüsusilə böyük maraqla qarşılanır.
Bu barədə Özbəkistandakı Heydər Əliyev adına Azərbaycan Mədəniyyət Mərkəzinin direktoru, Azərbaycanın Daşkənddəki Səfirliyinin birinci katibi Samir Abbasov bildirib. Onun sözlərinə görə, aprelin 13-14-də Daşkənddə beynəlxalq turizm sərgisində Azərbaycan Mədəniyyət Mərkəzi "Baku Shopping Festival"ın təqdimatını həyata keçirib: "Hazırladığımız xüsusi videoçarx Azərbaycan stendində nümayiş etdirilib, ticarət festivalına dair bukletlər paylanıb".
S.Abbasov qeyd edib ki, Bakıda keçirilən Ticarət Festivalı Özbəkistanın bir sıra aparıcı xəbər agentlikləri tərəfindən də geniş işıqlandırılıb. Heydər Əliyev adına Azərbaycan Mədəniyyət Mərkəzinin iştirakı ilə Özbəkistanın aparıcı UZBEKISTANTODAY xəbər agentliyində “В Баку Азербайджана ежегодно будет проводится «Шоппинг фестиваль» sərlövhəli məqalə dərc olunub. Məqalədə Azərbaycanın mədəniyyət və turizm naziri Əbülfəs Qarayevin "Baku Shopping Festival 2017" haqqında fikirləri də öz əksini tapıb.
Hazırda Azərbayanın turizm potensialı, o cümlədən "Baku Shopping Festival"ının təbliği məqsədilə yerli sosial mediada geniş təbliğat kampaniyası həyata keçirilir.
