Ənvər Fərəcov: "Birgə fondun yaradılması informasiya texnologiyaları sahəsində bir sıra layihələrin həyata keçirilməsinə imkan verəcək"
"Azərbaycan və Rusiya informasiya texnologiyaları sahəsində perspektivli layihələrin maliyyələşdirilməsi məqsədilə birgə müəssisə fondunun yaradılması üçün hüquqi baza hazırlanır". Bunu mətuata açıqlamasında Nəqliyyat, Rabitə və Yüksək Texnologiyalar Nazirliyinin İnformasiya Texnologiyalarının İnkişafı Dövlət Fondunun icraçı direktoru Elçin Zeynalov deyib.
Onun sözlərinə görə, bununla bağlı birgə müəssisə fondunun yaradılması əlavə imkanlar təmin edəcək: "Birgə fond yaratmaq üçün biz Rusiya "Venture" şirkəti ilə müzakirə aparırıq. Hazırda onun formalaşması üçün hüquqi baza hazırlanır. Burada bizim bazara Rusiya, onların bazarına Azərbaycan şirkətlərinin çıxış imkanlarından söhbət gedir. Bu yolla İKT sahəsində hər iki ölkədə əlaqələri genişləndirmək, yeni imkanlar əldə etmək mümkün olacaq".
E.Zeynalovun açıqlamasından o da məlum olub ki, hər iki ölkənin mövcud qanunvericiliyi belə bir fondun yaradılmasına imkan verir. Maraqlıdır, bəs ekspertlər informasiya texnologiyalarının inkişafı ilə bağlı birgə fondun yaradılması təşəbbüsünə necə yanaşır? Məsələyə münasibət bildirən ekspert Ənvər Fərəcovun sözlərinə görə, prinsipcə, iki ölkə arasında birgə fondun yaradılması perspektivlidir: "Düzdür, Rusiyada informasiya texnologiyalarının inkişaf səviyyəsi Qərb ölkələrində olduğu qədər deyil. Ancaq nəzərə alsaq ki, Rusiya böyük dövlətdir, kosmik sənayeyə və bir sıra digər sənaye sahələrinə malikdir, o baxımdan birgə fondun yaradılması məqsədəuyğundur. Çünki Rusiyanın da bu sahədə müəyyən texnoloji imkanları var. İT üzrə bir sıra mütəxəssislər qonşu ölkədə fəaliyyət göstərir. Bununla bağlı birgə fondun yaradılması sözügedən sahədə bir sıra layihələrin həyata keçirilməsinə imkan verəcək. Eyni zamanda bu, elmi-texniki sahədə təcrübə mübadiləsinə öz töhfəsin verə bilər. Çünki görürsən ki, İT sahəsi ilə bağlı ortada maraqlı layihələr olur. Amma vəsaitin olmaması səbəbindən onu həyata keçirmək mümkün olmur. Birgə fondun olması bu kimi problemlərin həll olunmasına öz müsbət təsirini göstərəcək. O üzdən, bununla bağlı iki ölkə arasında əməkdaşlığın genişləndirilməsinə müsbət prizmadan yanaşıram". Vidadi ORDAHALLI
