Bahadur Bilalov: "Məndə olan məlumata görə, oktyabr ayında da belə bir festivalın keçirilməsi gözlənir"
Məlum olduğu kimi, aprelin 10-dan etibarən paytaxt Bakıda Şoppinq Festivalı keçirilir. Şoppinq Festivalı başladığı gündən qaytarılan ƏDV-nin həcmi açıqlanıb. Məlumata görə, aprelin 10-dan indiyə qədər 350 min manatdan çox vəsait Vergilər Nazirliyi tərəfindən geri qaytarılıb.
Bunu jurnalistlərə açıqlamasında mədəniyyət və turizm naziri Əbülfəs Qarayev deyib. Nazirin sözlərinə görə, bu ümumi məbləğin 10 faizinin qaytarılması deməkdir: "Ümumi dövriyyədə olan alış prosesi təxminən 3 milyon yarım artıb. Digər vaxtlara nisbətdə bu rəqəmlər ümidvericidir. Yəni məqsəd kimi qarşıya qoyulan rəqəmlərə görə hərəkət edirik. Hər hansı çətinliklər olduğu zaman onları çevik şəkildə bank mütəxəssisləri, eyni zamanda, Vergilər Nazirliyinin əməkdaşları çox peşəkarlıqla həll edirlər. Hələlik marağın artdığını görürük. Festivalın keçirilməsi üçün 2 ay müddətində hazırlıq işləri gördük, ciddi təbliğat və reklam olmamışdı. Bu isə onu sübut edir ki, festival öz-özlüyündə maraq kəsb edib".
Ə.Qarayev bildirib ki, festival ayı bitdiyi zaman vəsaitin daha çox kimlərə - əcnəbilərə, yaxud yerli vətəndaşlara qaytarıldığı bəlli olacaq.
Bakı Şoppinq Festivalı başladığı gündən indiyə qədər 350 min manatdan çox ƏDV-nin qaytarılması Azərbaycan məhsullarının dünyada tanıdılmasında necə rol oynayacaq?
Turizm sahəsi üzrə ekspert Bahadur Bilalov "Bakı-Xəbər"ə açıqlamasında qeyd etdi ki, bir çox ölkələrdə şoppinq festivalı keçirilib: "Bu cür tədbirlər şoppinq həvəskarı olan turistlərin ölkəyə gəlməsinə şərait yaradır. Hər bir ölkədə keçirilən bu cür festivallar ölkənin tanıtımı baxımından böyük əhəmiyyət daşıyır. Ölkə haqqında informasiyanın turistlərə çatdırılmasının böyük önəmi var. Bu məlumatlar xaricdə yaşayanların Azərbaycanda keçirilən festivalla tanış olmasına şərait yaradır".
Həmsöhbətimizin fikrincə, gələcəkdə də bu cür şoppinq festivalları keçiriləcək: "Məndə olan məlumata görə, oktyabr ayında da belə bir festivalın keçirilməsi gözlənir. Oktyabr ayında keçiriləcək şoppinq festivalında geniş stimullaşdırıcı tədbirlər olsa, daha çox turist cəlb etmək mümkündür. Məsələn, Dubay festivalında o ölkəyə gələnlərin aviabileti əsasında lotereya oyunu keçirilir. O lotereyaya bahalı avtomobillər, qızıl, hətta Dubayda mənzil belə qoyulur. Mən düşünürəm ki, bu cür addımları bizdə də reallaşdırmaq olar. Yaxın müddət ərzində ölkədə keçiriləcək şoppinq festivalına daha çox turistin cəlb olunması üçün diqqəti cəlb edən layihələr həyata keçirmək lazımdır. Turistlərə 350 min dəyərində ƏDV-nin geri qaytarılması da Azərbaycanın xarici ölkələrdə tanıdılması baxımından əhəmiyyətlidir".
Günel CƏLİLOVA
çısı olacağı layihədə Azərbaycan heç vaxt iştirak edə bilməz".
Məhəmmədəli QƏRİBLİ
