Rəsul Cahangirli: "Əvvəlki illərdə formalaşan güclü infrastruktur hesabına artıq..."
Prezident İlham Əliyev Yevlaxda keçirilən müşavirədə bildirib ki, Azərbaycan öz iqtisadi potensialını şaxələndirə bilib. Hazırda qeyri-neft sektoru iqtisadiyyatın təxminən 65 faizini təşkil edir: "İxracatda isə biz bunu hələ ki, deyə bilmərik. İxracımızın böyük hissəsi hələ ki, neft və qazla bağlıdır. Bu da yəqin ki, indiki dövr üçün təbiidir. Çünki biz neft-qaz potensialımızı artırırıq. Ancaq qarşıda duran vəzifələrdən biri də odur ki, biz ixracda da şaxələndirməyə nail olaq. Necə ki, buna ümumdaxili məhsulda nail olmuşuq, ixracda da buna nail olmalıyıq".
Dövlət başçısının açıqlamasından o da məlum olub ki, bu ilin üç ayında iqtisadiyyatımızın qeyri-neft sektoru 2,4 faiz artıb. Qeyri-neft sənayemiz 2 faiz, kənd təsərrüfatı 3,5 faiz artıb. Üç ay ərzində 80 mindən çox yeni iş yeri yaradılıb: "Bu müsbət dinamika deməyə əsas verir ki, biz il ərzində daha da böyük nəticələrə gəlib çatacağıq. Çünki götürdüyümüz bu temp və geniş vüsət almış islahatlar, o cümlədən sahibkarlar tərəfindən bizim siyasətimizə göstərilən praktiki dəstək, - onlar öz işi ilə, öz investisiyaları ilə bunu göstərirlər, - deməyə əsas verir ki, 2017-ci il çox uğurlu il olacaq".
İqtisadiyyatın şaxələndirilməsinə, qeyri-neft sektorunun çəkisinə görə Azərbaycan MDB ölkələri arasında hansı yerdədir? Məsələyə münasibət bildirən ekspert Rəsul Cahangirlinin fikrincə, Azərbaycan MDB məkanında bununla bağlı ən münasib mövqedədir: "2006-cı ildən sonra Azərbaycanda sürətli iqtisadi inkişaf baş verdi. Bəzi hallarda hətta iqtisadi inkişaf tempi 35 faizə qədər yüksəlib. Nəticədə iqtisadi artım göstəriciləri üzrə faizin yüksək olması Azərbaycanın MDB ölkələri ilə müqayisədə iqtisadi artım baxımından daha öndə olmasına gətirib çıxardı. Sözsüz ki, son 10 ildə iqtisadi artım tempi baxımından Azərbaycanın ön cərgədə yer alması qeyd etdiyimiz dövrdə müşahidə edilən yüksək iqtisadi artımla bağlıdır. 2015-ci ildən başlayaraq neftin dünya bazarında qiymətinin kəskin düşməsi fonunda iqtisadi artım tempi, digər MDB ölkələrində olduğu kimi, Azərbaycanda da azalmağa başladı. Buna rəğmən, son 10 ili götürdükdə, Azərbaycan bu illər ərzində orta iqtisadi artım göstəricisinə görə MDB-də ən yaxşı iqtisadiyyata malik olan ölkədir. Əvvəlki illərdə formalaşan güclü infrastruktur hesabına, artıq postneft dövrünün prinsiplərinə uyğun olaraq, iqtisadi siyasət həyata keçirilməlidir. Azərbaycan iqtisadiyyatı postneft dövrünə qədəm qoyub. Bu dövrdə isə son on il ərzində yaradılan infrastrukturdan istifadə etməklə iqtisadi inkişaf yolunda növbəti daha iri addımlarla irəli getmək olduqca vacibdir. Müşahidələr göstərir ki, MDB ölkələrində qeyri-neft sektorunun iqtisadiyyatda çəkisi Azərbaycanla müqayisədə böyük deyil".
Vidadi ORDAHALLI
