Qulu İsmayılov: "Azərbaycanın coğrafi mövqeyi, yaradılmış infrastrukturu, zəngin təbii ehtiyatları, əhali resursu və s. amillər bunu həyata keçirməyə tam imkan verir"
Azərbaycan Prezidenti İlham Əliyev qeyri-neft ixracatçılarının Yevlaxda keçirilən respublika müşavirəsində deyib ki, növbəti 3-4 il ərzində çalışmalıyıq ki, əsas istehlak malları ilə özümüzü tam şəkildə təmin edək: "Bu, ixrac üçün əlavə imkanlar yaradacaq. Beləliklə, biz bundan sonra bu gözəl nəticələr əsasında işimizi daha da təkmilləşdirməliyik, fəaliyyətimizi genişləndirməliyik. Əlbəttə ki, qeyri-neft ixracını artırmaq üçün, ilk növbədə, daxili tələbatı yerli məhsullarla təmin etməliyik və biz buna yaxınlaşırıq. Hər il regional inkişaf proqramına yekun vururuq. Bu mövzu daim gündəlikdə olur ki, biz hansı məhsullarla özümüzü nə qədər təmin edirik, hər il də dinamikanı görürük. Ancaq hələ ki, buna tam nail ola bilməmişik", - deyə o vurğulayıb.
Dövlət başçısı qeyd edib ki, biz daim inkişafda olmalıyıq: "Çünki ölkə dinamik şəkildə inkişaf edir və əhali artır. İnkişaf etmiş ölkələrdə əhalinin sayı ya sabit qalır, ya da ki, azalır. Bizim ölkəmizdə isə əhali artır. 2004-cü ildə birinci regional proqramı qəbul edərkən bizdə əhali az idi. İndi əhalinin sayı 10 milyona yaxınlaşır. Bu, əlbəttə ki, bizim böyük üstünlüyümüzdür, eyni zamanda, onu göstərir ki, iqtisadi inkişaf çox sürətli olub. Ona görə insanlar daha da yaxşı yaşamağa başladılar, rifah yüksəldi və təbii ki, əhali də artır. Ancaq, eyni zamanda, bu müsbət tendensiya bizim qarşımızda çox ciddi vəzifələr qoyur. Biz istehsalımızı daim artırmalıyıq ki, daxili tələbatı tam ödəyək və ixraca rəqabətqabiliyyətli mallar təqdim edək. Ona görə növbəti illərdə daxili tələbatı yerli məhsullarla təmin etmək məsələləri birinci dərəcəli vəzifələrdir. Eyni zamanda, biz dövlətin dəstəyi ilə yeni bazarlara çıxış əldə etməliyik. Biz bunu edirik və edəcəyik, ixracyönümlü məhsulların həcmini artırmalıyıq. Ərzaq təhlükəsizliyi də bu iki amillə bilavasitə bağlı olan məsələdir. Biz buna da yaxınlaşırıq ki, ərzaq təhlükəsizliyimizi tam şəkildə təmin edək".
Prezidentin növbəti 3-4 il ərzində əsas istehlak malları ilə özümüzü tam şəkildə təmin etməklə bağlı qarşıya qoyduğu məqsədə nail olmaq mümkündürmü?
İqtisadçı Qulu İsmayılov qəzetimizə bildirdi ki, ölkə başçısının bütün davranışları göstərir ki, o, ölkənin gələcəyi üçün mühüm işlərin, qabaqlayıcı tədbirlərin görülməsində maraqlıdır: "Ölkə başçısı iqtisadiyyatımızın inkişafı üçün yeni strategiyanın müəyyənləşməsinə çalışır. Neftin qiymətinin sürətlə ucuzlaşmasından sonra qarşıya, bir nömrəli vəzifə kimi, qeyri-neft sektorunun inkişafı qoyuldu. Bunun üçün nə lazımdırsa edilir. Yəni söhbət dövlətin yaratdığı şəraitdən gedir. Qanunvericilik bazası yeni reallıqlara uyğun tənzimləndi. Gömrükdə bir sıra islahatlara start verildi. Yerli sahibkarlar lazımsız yoxlamalardan azad edildi. Bunun nəticəsində irəliləyiş əldə olunub. Statistik məlumatlardan görünür ki, ölkəyə idxal azalıb. İxrac məhsullarının həcmində isə artım var. Ancaq ölkə başçısının qeyd etdiyi kimi, biz istənilən nəticəyə tam nail ola bilməmişik. Azərbaycanın daxili tələbatını lazım olan mallarla təmin etmək üçün kifayət qədər potensialı var. Ölkə başçısı çox doğru olaraq vurğulayır ki, daxili tələbatı təmin etməklə tam kifayətlənməməliyik. Eyni zamanda, ixrac üçün olan məhsulların miqdarını artırmalıyıq. Düşünürəm ki, Prezidentin müəyyənləşdirdiyi dövr ərzində biz qarşıya qoyulan məqsədə tam çata bilərik. Niyə də çatmayaq ki? Ortada möhkəm siyasi iradə var. Dövlət bütün bu işləri stimullaşdırmağa razıdır. Azərbaycanın coğrafi mövqeyi, yaradılmış infrastrukturu, zəngin təbii ehtiyatları, əhali resursu və s. amillər bunu həyata keçirməyə tam imkan verir".
Məhəmmədəli QƏRİBLİ
