Elşən Əliyev: "Xüsusilə də buna uyğun ixtisaslar ali məktəblərin qəbul siyahısına salınmalıdır"
Azərbaycan Prezidenti İlham Əliyev qeyri-neft ixracatçılarının Yevlaxda keçirilən respublika müşavirəsində bildirib ki, kadr hazırlığına xüsusi diqqət göstərilməlidir: "Biz ixrac üzrə mütəxəssislər hazırlamalıyıq. Ümumiyyətlə, kadr hazırlığı indi qarşımızda duran ən vacib məsələlərdən biridir. Çünki ölkə inkişaf edir, yeni müəssisələr yaradılır və bu müəssisələrdə fəaliyyət göstərən kadrlar hazırlıqlı olmalıdır".
Prezident bildirib ki, xüsusilə ixracyönümlü müəssisələrdə hazırlıqlı kadrların təlimi mühüm məna daşıyır və dövlət orqanları bu işlərdə fəal olmalıdır: "İxrac prosedurlarını sadələşdirmək lazımdır. Bu istiqamətdə də addımlar atılır. Əvvəlki illərdə olduğu kimi, indi ixrac qarşısında süni əngəllər yoxdur. Ancaq, eyni zamanda, həm institusional tədbirlər görülməlidir, həm də real həyatda bütün müvafiq dövlət qurumları ixracı stimullaşdırmaq və asanlaşdırmaq üçün əlavə səylər göstərməlidirlər".
Ölkə başçısının qeyd etdiyi ixrac mütəxəssislərini hazırlamaq üçün hansı addımlar atılmalıdır?
Marketinq üzrə mütəxəssis Elşən Əliyev qəzetimizə açıqlamasında bildirdi ki, istənilən sahənin inkişafı üçün təcrübəli kadrlara ehtiyac var: "Ölkə başçısı çox aktual olan bir problemə toxunub. Biz qarşımıza hansı hədəfi qoyuruqsa, ona uyğun infrastrukturun, kadrların hazırlanmasına önəm verməliyik. Azərbaycan qeyri-neft sektorunun inkişafına xüsusi önəm verir və gələcək üçün ixracatın həcmini artırmağı hədəfləyir. Azərbaycan mallarının xarici bazarda özünə yer tapması, bazara girməsi üçün keyfiyyətli istehsalla yanaşı, həm də düzgün marketinq siyasəti qurulmalıdır. Bura reklam strategiyasını da əlavə etsək, onda bizim doğrudan da peşəkar kadrlara ehtiyacımız yaranır. Təbii ki, bunun üçün xarici dilləri, iqtisadiyyatı, beynəlxalq hüququ yüksək dərəcədə bilmək qabiliyyəti tələb olunur. Məsələn, turizm sahəsində biz bunu aydın hiss edirik. Ölkəyə turist axını çoxalanda görürük ki, bütün zəruri şərait var, ancaq peşəkar kadr çatışmazlığı hiss edilir. Prezidentin ixracat üzrə mütəxəssislərin yetişdirilməsi istiqamətində tapşırığı ilə bağlı əlaqədar qurumlar indidən işlər görməlidir. Xüsusilə də buna uyğun ixtisaslar ali məktəblərin qəbul siyahısına salınmalıdır. Oxşar ixtisasların olduğu ali məktəblərdə isə bu istiqamətdə dərslərin tədris olunmasına başlanmalıdır".
Məhəmmədəli QƏRİBLİ
