Vahid Məhərrəmov: "Sadalanan məsələlər kompleks şəkildə həll olunsa, fermerlər daha çox məhsul istehsal edəcək"
Prezident İlham Əliyev qeyri-neft ixracatçılarının Yevlaxda keçirilən respublika müşavirəsində çıxış edərək bir sıra məqamlara toxunub. Dövlət başçısı görülən işlər çərçivəsində fermerlərə şərait yaradıldığını və bu istiqamətdə işlərin getdiyini bildirib.
Onun sözlərinə görə, bu il fermerlərə təxminən 150 min hektar yeni suvarılan torpaq təhvil veriləcək: "Bir il ərzində bu qədər suvarılan torpağı əldə etməyimiz tarixi nailiyyətdir. "Made in Azerbaijan" brendini dünyada tanıtdırmaq üçün praktiki addımlar atılır. Artıq bu brend bu gün dünyada şöhrət qazanır. Əlbəttə ki, dövlət tərəfindən təşkil edilmiş sərgilər və o sərgilərdə sahibkarların iştirakı gözəl nəticələrə gətirib çıxarır. Mənə verilən məlumata görə, bir neçə sərgidə artıq kontraktlar da imzalanıb. Əgər biz bu sərgilərdə iştirak etməsəydik, kontraktlar da imzalanmazdı. Yəni biz gördük ki, sahibkarlara əlavə kömək göstərilməlidir". Prezidentin fikrincə, kreditlərin verilməsi ilə yanaşı, fermerlər torpaq vergisindən başqa bütün vergilərdən azaddır: "Texnika alınır, güzəştli şərtlərlə gübrələr, yanacaq, subsidiyalar verilir. Bütün bunlar qeyri-neft sektorumuzu canlandırdı. Ancaq sahibkarlara əlavə dəstək verilməlidir ki, onlar artıq öz məhsullarını xarici bazarlara çıxarsınlar. Çünki bu, onlara da, dövlətə də lazımdır. Bu, ölkəmizə valyuta gətirir".
Bütövlükdə, fermerlərə veriləcək təxminən 150 min hektar yeni suvarılan torpaqdan səmərəli istifadə olunması üçün nə kimi işlər görülməlidir?
Məsələyə münasibət bildirən kənd təsərrüfatı sahəsi üzrə mütəxəssis Vahid Məhərrəmov, prinsipcə, buna müsbət yanaşsa da, hesab edir ki, bununla bağlı kompleks tədbirlər görülməlidir: "Sistemli qaydada bu sahənin problemləri həll olunmalıdır. Kənd təsərrüfatında bir sistemlilik yaratmaq lazımdır. Bu gün problem təkcə su ilə bağlı olsa, bu məsələni həll etmək o qədər də çətin deyil. Ölkənin suvarma suyuna olan tələbatını ödəyə biləcək resurs böyükdür. Bu da imkan verir ki, mövcud olan su resursundan səmərəli istifadə etməklə müəyyən nəticə əldə etmək mümkün olsun. Bu sahədə həlli vacib olan məsələlərdən biri də keyfiyyətli toxumun hazırlanmasıdır. Fermerlərin buna çox ehtiyacı var. Yeni keyfiyyətli, məhsuldar toxum sortlarının yetişdirilməsinə ciddi ehtiyac var. Alimlər bu sahə ilə ciddi məşğul olmurlar. Fikrimcə, məhsuldarlığı artırmaq üçün toxum problemi həll olunmalıdır. Digər tərəfdən, ölkəyə gətirilən toxumların rayonlaşdırılması istiqamətində sistemli işlər aparılmalıdır. Azərbaycanda 9 iqlim qurşağı var və bunların hər birinin özünə uyğun sortlar yetişdirilməlidir. Bu çox vacib məsələdir. Bütün bunlarla yanaşı, kənd təsərrüfatı sahəsi üzrə kadrlar yetişdirilməlidir. Fermerlər, alimlər bu işə cəlb olunmalıdır. Yəni bu sahədə elmi yanaşmaya ehtiyac var. Kənd təsərrüfatı məhsullarının sığortalanması məsələsi həll olunmalıdır. Çünki bu, risqli sahədir. Məsələ ondadır ki, son illər iqlim dəyişikliyi ilə əlaqədar havaların kəskin dəyişməsinin şahidi oluruq. Fermerlər keyfiyyətli gübrə ilə təmin olunmalıdır. Ən nəhayət, banklar kənd təsərrüfatına kredit qoymaqda maraqlı deyil. Başlıca problemlərdən biri də budur. Sadalanan məsələlər kompleks şəkildə həll olunsa, fermerlər daha çox məhsul istehsal edəcək".
Vidadi ORDAHALLI
