İldırım Qurbanov: "Məsələ ondadır ki, dünya bazarına rəqabətqabiliyyətli kənd təsərrüfatı..."
Azərbaycan iqtisadiyyatının inkişafında və qeyri-neft sektorunun şaxələndirilməsində özəl sektor xüsusi rol oynayır. Bu baxımdan sahibkarlığın inkişafı prioritet istiqamətlərdəndir. Son illərdə biznes və investisiya mühitinin davamlı olaraq yaxşılaşdırılması istiqamətində bir sıra işlər görülüb.
Bu sahədə qanunvericilik bazasının təkmilləşdirilməsi, inzibati prosedurların sadələşdirilməsi, dövlət dəstəyinin genişləndirilməsi ilə bağlı görülmüş işlər, real sektora göstərilən maliyyə dəstəyi, sahibkarlığın dəstəklənməsi məqsədilə institusional mexanizmlərin yaradılması belə tədbirlərdəndir.
Aprelin 17-də Yevlaxa səfər edən Prezident İlham Əliyev burada Aran Regional İnkişaf Mərkəzində ixracyönümlü qeyri-neft məhsullarının sərgisi ilə tanış olub. Dövlət başçısına bildirilib ki, sərgidə qeyri-neft məhsulları ixrac edən 60-dan çox şirkətin 450-yə yaxın çeşiddə şərab, çay, meyvə-tərəvəz, mineral sular, şirələr, bal, şirniyyat, tekstil və digər məhsulları nümayiş olunur. Bu məhsullar daxili tələbata yönəldilməklə yanaşı, Avropa, MDB ölkələri, ABŞ, Birləşmiş Ərəb Əmirlikləri, Çin, Türkiyə, İran, Səudiyyə Ərəbistanı və digər ölkələrə ixrac edilir.
Məsələn, artıq 18 ildir bazarda olan "Gazelli Group" Azərbaycanın ilk milli kosmetika istehsalçısıdır. Şirkətin məhsullarının hazırlanmasında ölkənin təbii nemətlərindən istifadə edilir. 250-dən çox insanı işlə təmin edən bu şirkət "Triple Youth" məhsulu ilə dünyada nüfuz qazanıb. Bu məhsulun hazırlanmasında Naftalandan alınan ağ yağdan istifadə olunur. Bu isə dünyada bir ilkdir.
Ümumilikdə, ekspertlər bir neçə adda ixracyönlü məhsulun ölkə daxilində istehsal olunmasını necə dəyərləndirir? Sözügedən məsələni "Bakı-Xəbər"ə şərh edən iqtisadçı-ekspert İldırım Qurbanov buna müsbət prizmadan yanaşdı. Onun fikrincə, ölkədə qeyri-neft sektorunu daha da inkişaf etdirmək üçün görülən tədbirlərin miqyası genişləndirilməlidir: "Ümumiyyətlə, onu qeyd etmək lazımdır ki, qeyri-neft sektorunun inkişafı, xüsusilə tez əmələ gələn və əmək tutumlu olan kənd təsərrüfatına investisiya cəlbi üçün iqtisadi mühit formalaşdırılmalıdır. Bu sahənin inkişafı üçün potensial çox böyükdür. Məsələ ondadır ki, dünya bazarına rəqabətqabiliyyətli kənd təsərrüfatı məhsulları ixrac edə bilsək, o zaman iqtisadiyyatın dayanıqlığını təmin edə bilərik. Bu sahədə ciddi işlərin görülməsi üçün cənab Prezident tərəfindən bir sıra mühüm tapşırıqlar verilib. Regionlarda icra hakimiyyəti orqanları da sahibkarlar üçün şərait yaratmalıdır. Sahibkarlar istehsal etdikləri məhsulları satmaqda çətinlik çəkməməlidir. Görülən tədbirlər çərçivəsində bazar infrastrukturu yaradılmalı, daxili bazar qorunmalıdır.
Bu tip tədbirlərin görülməsi, sərgilərin təşkil olunması təqdirəlayiq hadisədir. Bu daha çox və müxtəlif adda məhsul istehsalına stimul verə bilər".
Vidadi ORDAHALLI
