Zakir Əhmədov: "İnfrastruktur yaradıldıqdan sonra isə regionlarda istehsalat və xidmət sahələrinin yaradılmasına start verildi"
Məlum olduğu kimi, Prezident İlham Əliyevin sədrliyi ilə aprelin 17-də Yevlaxda qeyri-neft ixracatçılarının respublika müşavirəsində bir sıra məsələlər müzakirə olunub.
Müşavirədə çıxış edən Prezident İlham Əliyev indəyə qədər qəbul olunan regional inkişaf proqramları barədə danışıb. Onun sözlərinə görə, birinci və ikinci proqram artıqlaması ilə icra olunub: "Sahibkarlığın inkişafı haqqında danışarkən biz mütləq regional inkişaf proqramlarını qeyd etməliyik. Birinci proqram 2004-cü ilin əvvəlində - fevral ayında qəbul edilmişdir. Bu proqramın qəbul edilməsi mənim 2003-cü ildə seçkiqabağı proqramımın bir hissəsi idi. O vaxt bəyan etmişdim ki, əgər xalq etimad göstərərsə, regionların inkişafı mənim üçün əsas vəzifələrdən biri olacaq və belə də oldu. 2004-cü ildə birinci, 2009-cu ildə ikinci və 2014-cü ildə üçüncü regional inkişaf proqramları qəbul olunmuş və icra edilmişdir. Onu da qeyd etməliyəm ki, birinci və ikinci proqram artıqlaması ilə icra olunmuşdur. O proqramlarda nəzərdə tutulan bütün vəzifələr həyatda öz əksini tapmışdır. Hazırda biz üçüncü Regional İnkişaf Proqramının icrası ilə məşğuluq. Əminəm ki, bu proqram da uğurla icra ediləcək".
Ümumən sözügedən proqramlar qəbul olunmasaydı, o zaman vəziyyət necə olacaqdı? Məsələyə münasibət bildirən ekspert Zakir Əhmədovun sözlərinə görə, həmin proqramlar olmasaydı, regionların inkişafı dinamik və sistemli olmayacaqdı: "Çünki regionların inkişafına dair proqramlar konkret hədəfləri, vəzifələri özündə ehtiva edirdi. Həmin proqramlarda hər bir bölgənin özünəməxsus iqtisadi potensialı nəzərə alınaraq inkişaf istiqamətləri müəyyən olunmuşdu. İlk mərhələdə regionlarda müasir infrastruktur yaradıldı. Nəzərə almaq lazımdır ki, infrastruktur olmadan inkişafdan söhbət gedə bilməz. Hər bir inkişafın özəyində müasir infrastruktur dayanır. Belə olduqda sahibkar sərmayə qoymaqda maraqlı olur. İnfrastruktur yaradıldıqdan sonra isə regionlarda istehsalat və xidmət sahələrinin yaradılmasına start verildi. Nəticədə bölgələrdə məşğulluğun səviyyəsi artdı, işsizlik azaldı. O üzdən, həmin proqramlar olmasaydı, regionlar belə dinamik inkişaf etməzdi".
Vidadi ORDAHALLI
