Şaiq Muradov: "Azərbaycan brendi adı ilə istehsal olunacaq mobil telefonların detalları hansısa ölkələrdən gətirilib bizdə yığılacaq"
Azərbaycanda mobil telefon istehsal olunacaq. Ölkəmizdə "Made in Azerbaijan" brendi altında smartfonların yığılmasına başlanacaq. Bunu "CRM Group" şirkətinin baş direktoru Ramin Süleymanov media nümayəndələrinə açıqlamasında bildirib. Onun sözlərinə görə, yerli yığımlı ilk smartfon iyun ayında ictimaiyyətə təqdim olunacaq.
R.Süleymanov deyib: "Payızda bizə ayrılan istehsal sahələri bu qurğuların konveyer yığılmasının işə salınması üçün hazır olacaq. Biz, ümumilikdə, 10-a yaxın müxtəlif növ IT məhsulun, o cümlədən planşet kompyuter, noutbuk, printer və s. yığılmasının həyata keçirilməsi üçün patent hüququ əldə etmişik. Azərbaycanda yığılan məhsullar regional bazarlara ixrac ediləcək".
"CRM Group"un baş direktorunun sözlərinə görə, kompyuter və periferik avadanlıqların yığılmasının başlanması şirkətin 2018-ci il üçün prioritet planlarına daxildir: "Yüksək texnologiyalı avadanlıqların yığılması ölkədə həyata keçirilən ilk genişmiqyaslı layihədir. Biz bunu böyük addım və ölkə iqtisadiyyatına investisiya hesab edirik. Qonşu Türkiyədə, məsələn, "Casper" brendi altında noutbukların yığılması həyata keçirilir. Biz Azərbaycanda bu təcrübəni mənimsəmək və onu reallaşdırmaq niyyətindəyik".
"Made in Azerbaijan" brendi altında yerli telefonların istehsal olunmasına münasibət bildirən İKT sahəsi üzrə mütəxəssis Şaiq Muradov "Bakı-Xəbər"ə açıqlamasında qeyd etdi ki, bu, ölkə üçün müsbət haldır. Azərbaycan brendi adı altında mobil telefonun dünyaya çıxarılması sevindiricidir.
Həmsöhbətimiz hesab edir ki, Azərbaycan brendi adı ilə istehsal olunacaq mobil telefonların detalları hansısa ölkələrdən gətirilib bizdə yığılacaq: "Vaxtilə Azərbaycanda "Kür", "Nexus" adlı kompyuterlər yığılıb. Detallar xarici ölkələrdən gətirilib, bizdə mobil telefon, kompyuter, planşet və ya digər İKT avadanlığı yığılıb".
Ş.Muradov təklif edir ki, dünya üzrə tanınmış markaların zavodu burada açılsın: "Məsələn, "Samsung" firmasının zavodunu ölkədə açmaq olar. Yaxud o cür zavodların texnologiyalarından öyrənib bizdə tətbiq etmək lazımdır".
Günel CƏLİLOVA
