Rəsul Cahangirli: "Sahibkarlar Prezidentin çağırışından ciddi nəticə çıxarmalı və son dərəcə fəal olmalıdır"
"Qeyri-neft ixracını artırmaq üçün, ilk növbədə, daxili tələbatı yerli məhsullarla təmin etməliyik və biz buna yaxınlaşırıq". Bunu Prezident İlham Əliyev Yevlaxda qeyri-neft ixracatçılarının respublika müşavirəsində giriş nitqində deyib.
Dövlət başçısı qeyd edib ki, hər il regional inkişaf proqramına yekun vururuq və bu mövzu daim gündəlikdə olur ki, biz hansı məhsullarla özümüzü nə qədər təmin edirik: "Hər il də dinamikanı görürük. Ancaq hələ ki, buna tam nail ola bilməmişik. Ona görə də hesab edirəm növbəti 3-4 il ərzində biz çalışmalıyıq ki, əsas istehlak malları ilə özümüzü tam şəkildə təmin edək. Beləliklə, ixrac üçün əlavə imkanlar yaranacaqdır. Bir məsələni də qeyd etmək istəyirəm ki, biz daim inkişafda olmalıyıq. Çünki ölkə dinamik şəkildə inkişaf edir və əhali artır. İnkişaf etmiş ölkələrdə əhalinin sayı ya sabit qalır, ya da ki, azalır. Bizim ölkəmizdə isə əhali artır".
Dövlət başçısı onu da qeyd edib ki, əhalinin artım tendensiyası qarşıda çox ciddi vəzifələr qoyur: "Biz istehsalımızı daim artırmalıyıq ki, daxili tələbatı tam ödəyək və ixraca rəqabətqabiliyyətli mallar təqdim edək. Ona görə növbəti illərdə daxili tələbatı yerli məhsullarla təmin etmək məsələləri birinci dərəcəli vəzifələrdir. Eyni zamanda, biz dövlətin dəstəyi ilə yeni bazarlara çıxış əldə etməliyik. Biz bunu edirik və edəcəyik, ixracyönümlü məhsulların həcmini artırmalıyıq. Ərzaq təhlükəsizliyi də bu iki amillə bilavasitə bağlı olan məsələdir. Biz buna da yaxınlaşırıq ki, ərzaq təhlükəsizliyimizi tam şəkildə təmin edək".
Bütövlükdə, sözügedən müşavirədə Prezidentin toxunduğu məsələlər ölkədə qeyri-neft məhsullarının istehsalına və ixracına necə təsir göstərəcək?
Məsələyə münasibət bildirən ekspert Rəsul Cahangirlinin sözlərinə görə, müşavirədə Prezidentin toxunduğu məqamlar bu sahədə bir sıra işlərin görülməsinin vacib olduğunu göstərdi: "Prezidentin toxunduğu məsələlər aktual olaraq qalır. Məsələ ondadır ki, qeyri-neft məhsullarının ixracını genişləndirmək üçün birinci növbədə yerli tələbatı ödəmək lazımdır. Ondan sonra isə ixraca önəm verilməlidir. Bunun üçün də birinci növbədə istehsal olunan məhsulun rəqabət qabiliyyəti artırılmalıdır. Gərək istehsal olunan məhsul rəqabətədavamlı olsun ki, xarici bazarda müştəri tapa bilsin. Bunun üçün təkcə müasir avadanlıqların quraşdırılması yetərli deyil. Həm də ixtisaslı kadrların, işçi qüvvəsinin olmasına ehtiyac var. Hər halda, sahibkarlar Prezidentin çağırışından ciddi nəticə çıxarmalı və son dərəcə fəal olmalıdır. Eyni zamanda, yerlərdə icra qurumları sahibkarlıq mühitinin yaranmasına yardımçı olmalıdır. Çünki qeyri-neft məhsullarının istehsal və ixracı çox geniş, sistemli tədbirlər tələb edir. Rayonların bu sahə üzrə potensialı ətraflı öyrənilməli və buna uyğun ixtisaslaşma aparılmalıdır. Hesab edirəm ki, qeyri-neft ixracatçılarının respublika müşavirəsi bu sahədə bir sıra problemlərin həllini sürətləndirəcək".
Vidadi ORDAHALLI
