Eyyub Hüseynov: "Siqaretə aksiz vergi tətbiq olunmaqla yanaşı, marketlərdə onların satış yerini dəyişdirmək lazımdır"
Hesablama Palatası Azərbaycanda tütün məmulatlarının da Vergi Məcəlləsi ilə aksizlərə cəlb olunmasını təklif edir.
Hesablama Palatasının məlumatına əsasən, Vergi Məcəlləsi ilə (190.1-ci maddə) hazır məhsul olan konyak və şərabla yanaşı, konyak və şərab materialları da aksizə cəlb olunur. Palata ölkəyə hər il 1000 tondan çox tütün xammalının idxal olunmasını nəzərə alaraq, aksizlərə yalnız tütünü deyil, eyni zamanda tütün xammalının da aid edilməsini məqsədəuyğun sayıb.
Qurum hesab edir ki, tütün xammalının aksizlərə cəlb olunması sosial əhəmiyyət kəsb etməyən qiymət artımına səbəb olaraq, qeyri-neft sektorundan dövlət büdcəsinin gəlirlərinin həcminə müsbət təsir göstərməklə yanaşı, həmin məhsulların istehlakının məhdudlaşmasına səbəb ola bilər.
Məlumat üçün bildirək ki, Dövlət Statistika Komitəsinin 2015-ci ildə ev təsərrüfatları tədqiqatlarının məlumatlarına əsasən müəyyənləşdirdiyi göstəricilərə görə, Azərbaycanda 15 və daha yuxarı yaşda olan əhali arasında siqaret çəkənlər 35,5 faizdir. Siqaret çəkənlərin 0,4 faizi 15-19 yaş arasında olan oğlanlardır. Siqaret çəkənlərin 15,2 faizi 20-44, 24,1 faizi 45-64 yaşlı, 16,6 faizi isə yaşı 65-dən çox olan kişilərdir.
Ümumilikdə, Azərbaycanda yaşı 15-dən çox olan kişilərin 36 %-i siqaret çəkir. Siqaret çəkən qadınların sayı isə heç 1%-ə çatmır.
Qadınlar gündə orta hesabla 20, kişilər 15,9 ədəd siqaret çəkir.
Maraqlıdır, Azərbaycanda tütün məmulatlarının da Vergi Məcəlləsi ilə aksizlərə cəlb olunması siqaret çəkənlərin sayına təsir edə bilərmi?
Azad İstehlakçılar Birliyinin sədri Eyyub Hüseynov "Bakı-Xəbər"ə açıqlamasında ciqaretin satış qiymətinin bahalaşmasının tərəfdarı olduğunu bildirdi: "Siqaret bahalaşsa belə, Şəkidə "Azəri" Korporasiyası ucuz siqaret istehsal edir. Həmin siqaretlərin satış qiymətinin ucuz olmasına baxmayaraq, sağlamlıq üçün təhlükəlidir. Əsasən məktəblilər həmin siqaretdən istifadə edir. Bu səbəbdən də siqaretlərin satış qiymətinin qalxmasının tərəfdarıyam. Necə ki, 10 ildən artıqdır Bakı əhli qara kürü ala bilmir. Bunun səbəbi qiymətin yüksək olması ilə bağlıdır".
Həmsöhbətimizin sözlərinə görə, siqaretə aksiz vergi tətbiq olunarsa, bu, tütün istifadəçilərinin sayına təsir edəcək. Bəllidir ki, son zamanlar siqaret çəkənlərin arasında cavanların sayı artır. Bu təklif qəbul olunarsa, siqaret çəkənlərin sayı azalar.
E.Hüseynov onu da əlavə etdi ki, siqaretə aksiz vergi tətbiq olunmaqla yanaşı, marketlərdə onların satış yerini dəyişdirmək lazımdır: "Siqaretlər hər kəsin, xüsusilə də yeniyetmələrin görə bilmədiyi hissədə satılmalıdır".
Günel CƏLİLOVA
