Vüqar Bayramov: "İlkin mərhələdə sözügedən yağların qiymətlərində kəskin azalma müşahidə olunmaya bilər, amma..."
Sumqayıt Kimya Sənaye Parkının ərazisində tikilən sintetik mühərrik yağları istehsalı zavodu 2017-ci ilin sentyabrında istismara veriləcək. Bunu "Alco Lubricant" şirkətinin baş mühəndisi Ariz Quliyev deyib. Onun sözlərinə görə, zavodun istehsalat gücü illik 30 min ton mühərrik yağı təşkil edəcək: "Məhsulumuz "Mobil", "Exxon", "Shell" kimi şirkətlərin məhsulu ilə rəqabat aparacaq və həm daxili bazarda, həm də Azərbaycan brendi ilə xarici bazarlarda satılacaq".
Baş mühəndis deyib ki, zavodun tikintisi üçün 10 milyon dollara yaxın vəsait cəlb edilib.
Məlumat üçün qeyd edək ki, hazırda Azərbaycan mühərrik yağlarını 100 faiz xaricdən alır. Yəni ölkəyə mühərrik yağları ancaq idxal olunur. Təbii ki, sözügedən zavodun fəaliyyətə başlaması yerli tələbatı ödəyəcək. Həmçinin, bu imkan verəcək ki, məhsulun bir hissəsi xaricə ixrac olunsun. Zavodda 60-dan çox çeşiddə məhsul - yük avtomobilləri, minik avtomobilləri, motosiklet, transmissiya yağları və sənaye yağları istehsal olunacaq. Digər tərəfdən, yağların yerli istehsal olması məhsulların daha ucuz olmasına təsir göstərəcək.
Maraqlıdır, ekspertlər belə bir zavodun tikilməsinə necə yanaşır?
Məsələyə münasibət bildirən iqtisadçı-ekspert Vüqar Bayramovun sözlərinə görə, belə bir zavodun ölkədə fəaliyyət göstərməsinin bir sıra üstünlükləri var: "Nəzərə almaq lazımdır ki, mühərrik yağlarına hər zaman ehtiyac duyulur. Bu məhsulların xaricdən idxal olunması onların baha başa gəlməsinə səbəb olur. Mühərrik yağlarının yerli istehsal hesabına təmin edilməsi sürücülərin xeyrinə olacaq. Çünki bunun nəticəsində mühərrik yağlarının qiyməti düşəcək. Bu həm yerli istehsalın dəstəklənməsi baxımından mühüm addımdır, həm də idxaldan asılılığın aradan qaldırılmasına görə vacibdir. Belə zavodların qurulması həm idxaldan asılılığı aradan qaldıracaq, həm də, nəticə etibarilə, bazara təsir göstərəcək. İlkin mərhələdə mühərrik yağlarının qiymətlərində kəskin azalma müşahidə olunmaya bilər, amma zavod işlədikcə, gücü artdıqca, bu özünü qiymətlərdə də göstərə bilər. O baxımdan perspektiv planda yerli istehsalın artması və dəstəklənməsi qiymətlərin də düşməsinə gətirib çıxara bilər. Nəticədə istehsal edilən məhsulun bir hissəsi digər ölkələrə ixrac olunacaq". Vidadi ORDAHALLI
