Şahin Camalov: "Bu, şəhərdə sıxlığın yaranmasına səbəb ola bilər"
Xəbər verildiyi kimi, Hesablama Palatası Azərbaycanda kiçik mühərrik həcmli nəqliyyat vasitələri üzrə əmlak vergisindən azadolma, eyni zamanda müəssisələrin balansında olan maşınların əmlak vergisi ödənişi ilə bağlı dəyişikliklərin edilməsini təklif edir.
Palatanın yaydığı məlumata əsasən, Azərbaycan ərazisində şəxslərin mülkiyyətində və istifadəsində olan nəqliyyat vasitələri yol vergisinin vergitutma siyahısından çıxarılıb. Məcəllənin 199.4.3-cü maddəsinə görə isə, əvvəllər yol vergisinə cəlb olunan nəqliyyat vasitələri həm yol vergisindən, həm də əmlak vergisindən azad edilib.
Bundan başqa, Azərbaycan ərazisində istehsal edilən və ölkəyə idxal edilən avtomobil benzini və dizel yanacağı yol vergisinin vergitutma obyekti kimi müəyyən edilib. Lakin bu, həmin məhsulların pərakəndə satış qiymətlərinə təsir göstərməyib, yəni dövlət tərəfindən tənzimlənən həmin qiymətlər artırılmayıb. Bu da ölkə üzrə hesablanan və dövlət büdcəsinə ödənilən yol vergisinin istehlakçılar üçün vergi yükü olmadığını deməyə əsas verir.
Palata bunları, eləcə də nəqliyyat vasitələrinin mülkiyyətçilərinin aztəminatlı təbəqəyə aid edilmədiyini, eləcə də bazar iqtisadiyyatı prinsiplərinə uyğun inkişaf edən ölkələrin təkmil təcrübəsini nəzərə alaraq, bəzi təkliflərlə çıxış edir. Təkliflərdə bildirilir ki, müəssisələrin balansında olan avtonəqliyyat vasitələri əmlak vergisinin vergitutma obyektlərinə aid edilsin. Bundan başqa, yerindən və istifadə edilib-edilməməsindən asılı olmayaraq, rezident fiziki şəxslərə məxsus avtonəqliyyat vasitələrinin əmlak vergisi vergitutma siyahısına daxil edilsin.
Kiçikhəcmli mühərrikli avtomobillərin vergidən azad olunma təklifinə münasibət bildirən Təhlükəsiz Yol Alyansının koordinatoru Şahin Camalov "Bakı-Xəbər"ə açıqlamasında qeyd etdi ki, hazırda ölkədə kifayət qədər avtomobil var. Avtomobillərin sayının çox olması səbəblərindən biri də insanların nəqliyyat vasitəsinə rahat şəkildə sahib olmasıdır: "Kredit yolu ilə insanlar avtomobil sahibi olur. Bu gün nəqliyyat sıxlığı yaşanır. Bunu istənilən şəxs müşahidə edə bilər".
Həmsöhbətimiz hesab edir ki, kiçikhəcmli mühərrikli nəqliyyat vasitələrinin vergidən azad olunması nəqliyyat vasitələrinin artımına gətirib çıxaracaq. Bəllidir ki, bu gün əhalinin əksəriyyəti paytaxt Bakıda cəmləşib: "Zənnimcə, kiçikhəcmli avtomobillərin vergidən azad olunması şəhərdə sıxlığın yaranmasına səbəb ola bilər. Hər bir halda, insanların həyatını yüngülləşdiricək qanunvericilik təşəbbüsləri dəstəklənməlidir".
Günel CƏLİLOVA
