Vüqar Bayramov: "Qeyri-neft sektorunun inkişafı, birmənalı şəkildə, rəqabət qabiliyyətinin artırılması və..."
Azərbaycan növbəti ticarət nümayəndəliyini Birləşmiş Ərəb Əmirliyi və Çində yaradacaq. Bu barədə Bakıda keçirilən IV Beynəlxalq "Caspian Energy Forum-2017"də çıxışı zamanı iqtisadiyyat nazirinin müavini Sahil Babayev məlumat verib.
Bildirilib ki, Azərbaycanın ilk ticarət nümayəndəliyi Rusiyada yaradılıb. Nümayəndəliklərin yaradılmasında məqsəd Azərbaycanın investisiya potensialını bu ölkələrdə tanıtmaq, əcnəbi iş adamlarını Azərbaycana dəvət etmək, sahibkarlarımızın xarici ölkələrdəki maraqlarını qorumaqdır. Bundan başqa, son zamanlar Azərbaycan xarici ölkələrdə ticarət evləri də yaradır. Artıq Belarusda belə bir ticarət evi açılıb, Rusiya və Ukraynada ticarət evlərinin açılması ilə bağlı işlər aparılır.
S.Babayevin sözlərinə görə, qeyri-neft sektorunun dinamik inkişafı, iqtisadiyyatın şaxələndirilməsi üçün müəyyən işlər görülüb. Bu günədək 1,2 milyard manat dəyərində 121 layihəyə investisiya təşviqi sənədi verilib. Artıq ixracatçılara geri ödəmə sisteminin tətbiqinə başlanıb və 5 ay ərzində sahibkarlara 750 min manat həcmində dövlət dəstəyi göstərilib.
Bütövlükdə, xarici ölkələrdəki ticarət nümayəndəlikləri postneft iqtisadiyyatının formalaşmasında nə kimi rol oynayacaq?
Məsələyə münasibət bildirən iqtisadçı-ekspert Vüqar Bayramovun fikrincə, sözügedən nümayəndəliklərin bu işdə müəyyən rolu olacaq: "Bu nümayəndəliklərin məqsədi ticarəti dəstəkləmək, ölkələr arasında koordinasiyanı tənzimləməkdir. Bu fəaliyyət "Made in Azerbaijan" brendi daxilində həyata keçirilir. Çünki burada məqsəd Azərbaycan məhsullarının daha çox tanıdılmasına nail olmaqdır. Bu məsələdə önəmli tərəf səfirliklərdə nümayəndəliklərin fəaliyyətinin necə qurulacağıdır. Səfirliklərdə fəaliyyət uğurla qurularsa, bu, Azərbaycanın ixrac qabiliyyətinin artırılmasına səbəb ola bilər. Bu fəaliyyət inkişaf etmiş ölkələrdə praktiki olaraq yararlıdır. Qeyri-neft sektorunda əsas rəqabət ilk növbədə beynəlxalq standartlara uyğun məhsullar üzərində olmalıdır. Məhz bu kontekstdə rəqabətqabiliyyətli məhsulların istehsalı mümkün olacaq. Bu istiqamətdə işlərin sistemli görülməsi Azərbaycanda rəqabətqabiliyyətli məhsulların istehsal edilməsinə imkan verir. Rəqabətədavamlı məhsulların istehsalı ənənəvi xarici bazarlarda yox, həm də yeni bazarlarda rəqabətin aparılmasını nəzərdə tutur. Qeyri-neft sektorunun inkişafı, birmənalı şəkildə, rəqabət qabiliyyətinin artırılması və rəqabətli investisiya mühitinin yaradılması nəticəsində mümkündür".
Vidadi ORDAHALLI
