Vüqar Tofiqli: "Bələdiyyələr tərəfindən yerlərdə kənd təsərrüfatının inkişafı ilə bağlı məsələlərin icrasında heç bir problem yoxdur"
"Bələdiyyələr kənd təsərrüfatının inkişafına öz töhfələrini verməlidir". Bu sözləri Milli Məclisin Regional məsələlər komitəsinin iclasında millət vəkili Fəttah Heydərov deyib.
O bildirib ki, komitə ötən dövrdə uğurlu fəaliyyət göstərib, qəbul edilən qanunlar bələdiyyələrin fəallığına müsbət təsir göstərib.
F.Heydərovun deputatların və bələdiyyələrin ölkədə kənd təsərrüfatının inkişafı sahəsində öz səylərini əsirgəməməsini zəruri saydığını deyib: "Qəbələ rayonunda əsasən maldarlıqla məşğul olurlar. Yay aylarında Qəbələdə heyvandarlığın inkişafı üçün münbit şərait var, ancaq qışda aran rayonlarında qışlaqlara ehtiyac yaranır. Əvvəllər Qəbələ əhalisinin qışlaqlardan istifadə sahəsində problemi olmayıb. Amma son zamanlar bu sahədə müəyyən problemlərə rast gəlinir. Belə problemlər aradan qaldırılmalıdır ki, kənd təsərrüfatının, maldarlığın inkişafı daha sürətli olsun".
Maraqlıdır, bələdiyyələr kənd təsərrüfatının hansı sahələrinə dəstək verə bilər?
Bələdiyyə sahəsi üzrə mütəxəssis Vüqar Tofiqli "Bakı-Xəbər"ə açıqlamasında qeyd etdi ki, bələdiyyələr aqrar sahənin bütün sahələrinə dəstək verə bilər. Sadəcə, bunun üçün öncə bələdiyyələrə dəstək vermək lazımdır: "Bələdiyyələr tərəfindən yerlərdə kənd təsərrüfatının inkişafı ilə bağlı məsələlərin icrasında heç bir problem yoxdur. Elə bələdiyyələr var ki, orada aqrar sahənin necə inkişaf etməsini bilən mütəxəssislər var. Bələdiyyələrə dövlət tərəfindən göstərilən dəstək hər zaman layiqincə icra olunub. Bu sahədə daha da irəliləyiş əldə etmək istəyiriksə, müəyyən subsidiyalar ayrılmalı, güzəştli kreditlər verilməli və ya Sahibkarlıq Fondunun xəttilə bələdiyyələrə dəstək olmaq lazımdır. Bələdiyyələrin aylıq gəliri yüksək olarsa, onlar kənd təsərrüfatının inkişafına dəstək göstərə bilər".
Həmsöhbətimiz hesab edir ki, bələdiyyələr aqrar sektorda maldarlıq, əkinçilik sahəsinin inkişafına töhfə verə bilər.
Günel CƏLİLOVA
