"Birinə çatırdı, birinə yox, biri çox işlədirdi, biri az yandırırdı"
Məlum olduğu kimi, Prezident İlham Əliyev məcburi köçkünlər və onlara bərabər tutulan şəxslər üçün vahid aylıq müavinətin müəyyən edilməsi haqqında Fərman imzalayıb.
Sənədə əsasən, 2017-ci il yanvarın 1-dən məcburi köçkünlərin və onlara bərabər tutulan şəxslərin sosial müdafiəsi üçün hər bir məcburi köçkün və onlara bərabər tutulan şəxslər üçün 36,0 (otuz altı) manat məbləğində vahid aylıq müavinət müəyyən edilib. Bu zaman dövlət büdcəsindən yemək xərci müavinəti, kommunal və digər xidmətlər üzrə dövlət büdcəsindən ödənişlər ləğv olunur.
Nazirlər Kabinetinə vahid aylıq müavinətin şamil ediləcəyi kontingenti və müavinətin ödənilməsi qaydasını müəyyən etmək tapşırılıb. Bu arada baş nazir Artur Rasizadə məcburi köçkünlər və onlara bərabər tutulan şəxslər üçün yemək xərci müavinəti, habelə kommunal və digər xidmətlər üzrə dövlət büdcəsindən ödənişlər əvəzinə vahid aylıq müavinətin ödənilməsi qaydasını təsdiqləyib.
Bundan başqa, bir müddət əvvəl Tarif Şurası elektrik enerjisi və təbii qazla bağlı müvafiq qərar verib. Qərara əsasən, Azərbaycanda elektrik enerjisi və təbii qazın istifadəsində müvafiq limit tətbiq olunur. Təbii qazın pərakəndə satış tarifinə görə, əhali üzrə illik istehlak həcmi 1700 kubmetrədək, elektrik enerjisi istehlakı üzrə limit isə 300 kilovat-saatadək müəyyən olunub. Yəni sözügedən kvota çərçivəsində istehlak olunan qaz və elektrikin qiyməti əvvəlki qiymətlərlə, limitdən artıq istifadə olunan hissə isə yeni qiymətlərlə hesablanacaq.
Bütün hallarda, sözügedən qərarlar bu sahədə israfçılığın qarşısının alınmasında, enerji daşıyıcılarından daha səmərəli istifadə olunmasında nə kimi rol oynayacaq? Məsələyə münasibət bildirən millət vəkili Musa Quliyevin fikrincə, bu, enerji daşıyıcılarından daha səmərəli istifadə olunmasına müsbət təsir edəcək: "Məcburi köçkünlər və onlara bərabər tutulan şəxslərə aylıq müavinətin müəyyən edilməsi bu sahədə xidmətin keyfiyyətini artıracaq, ünvanlılığı və enerji daşıyıcılarından səmərəli istifadəni təmin edəcək. Bu günə kimi məcburi köçkünlər və onlara bərabər tutulan şəxslərin işlətdikləri enerji daşıyıcılarının dəyəri ümumi şəkildə dövlət büdcəsindən ödənilib. Pul ödənilirdi və nəzarət də yox idi. Kimin nə qədər ehtiyacı var, az, yaxud da çox işlətdi və s. Birinə çatırdı, birinə yox, biri çox işlədirdi, biri az yandırırdı. Bu mənada sosial müavinətin birdəfəlik 36 manat müəyyənləşdirilməsi onlara göstərilən qayğının ünvanlılığını təmin edir. O cümlədən, onlara imkan verir ki, ayrılan sosial müavinətləri ehtiyac və arzularına uyğun xərcləsinlər. Hesab edirəm ki, hazırda məcburi köçkünlərin əksəriyyəti normal şəraitli mənzillərdə yaşayır. Belə mənzillərdə artıq sayğaclar da quraşdırmaq, elektrik və qaz verilişini tənzimləmək mümkündür. Artıq "Azərişıq" və "Azəriqaz"a göstəriş verilib ki, dövlət hesabına sayğaclar quraşdırılsın. Bu sayğac göstəricisinə uyğun olaraq da məcburi köçkünlər ayrılan müavinətin hesabına işlətdiyi qazın pulunu ödəsin".
Vidadi ORDAHALLI
