Ənvər Fərəcov: "Bir sıra ölkələrin təcrübəsində bu var"
Xəbər verildiyi kimi, Prezident İlham Əliyev "Azərbaycan Respublikasının "Əmək" ordeninin təsis edilməsi ilə əlaqədar "Azərbaycan Respublikasının orden və medallarının təsis edilməsi haqqında" Azərbaycan Respublikasının Qanununda dəyişiklik edilməsi barədə" Azərbaycan Respublikasının 2016-cı il 29 noyabr tarixli, 428-VQD nömrəli Qanununun tətbiqi haqqında Fərman imzalayıb.
Sənədə əsasən, "Əmək" ordeni ilə Azərbaycanın inkişafına və rifahının təmin olunmasına yönəlmiş müstəsna əmək nailiyyətlərinə görə Azərbaycan vətəndaşları, əcnəbilər və vətəndaşlığı olmayan şəxslər təltif ediləcək.
Fərmana əsasən, Nazirlər Kabinetinə tapşırılıb ki, Azərbaycan Respublikası qanunlarının və Azərbaycan Respublikası Prezidentinin aktlarının "Azərbaycan Respublikasının "Əmək" ordeninin təsis edilməsi ilə əlaqədar "Azərbaycan Respublikasının orden və medallarının təsis edilməsi haqqında" Azərbaycan Respublikasının Qanununda dəyişiklik edilməsi barədə" Azərbaycan Respublikasının Qanununa uyğunlaşdırılması ilə bağlı təkliflərini üç ay müddətində hazırlayıb müvafiq qurumlara təqdim etsin. Fərmandan irəli gələn digər tapşırıqlar da verilib.
Ümumilikdə, "Əmək" ordeni, "Vətənə xidmət" ordenindən bir pillə aşağıda yer tutur. Bu da təbiidir, ona görə ki, burada söhbət ölkənin inkişafına və rifahının təmin olunmasına yönəlmiş müstəsna əmək nailiyyətlərindən söhbət gedir. Yəni ölkənin iqtisadi inkişafına töhfə verən şəxslərə bu orden veriləcək. Belə bir ordenin təsis olunması ölkədə qeyri-neft sektorunun, xüsusən də kənd təsərrüfatının inkişafında nə kimi rol oynayacaq?
Məsələyə münasibət bildirən ekspert Ənvər Fərəcovun fikrincə, bu, sadalanan sahələrin inkişafında müəyyən rol oynayacaq: "Şübhəsiz ki, "Əmək" ordeninin təsis olunması həmin sahədə çalışan insanlara bu və ya digər formada stimul verəcək. Necə ki, sovet dönəmində belə orden-medallar kənd təsərrüfatı sahəsində çalışanları həvəsləndirirdi. Bundan sonra sözügedən sahələrdə çalışan insanlar səy göstərəcək ki, işlədikləri sahələrdə uğurlar əldə etsin. Çünki ordenin qazanılması, öz növbəsində, həmin şəxsin müəyyən imtiyazlardan faydalanmasına öz təsirini göstərir. O üzdən, bunun ölkənin inkişafına müsbət təsir edəcəyi qənaətindəyəm. Yəni bu kimi həvəsləndirici vasitələrin rolunu danmaq olmaz. Bir sıra ölkələrin təcrübəsində bu var". Vidadi ORDAHALLI
