Dövlət İmtahan Mərkəzi (DİM) Vergilər Nazirliyi ilə birgə 2017-ci il yanvarın 28-də vergi orqanlarına işə qəbul olunmaq üçün namizədlər üçün test imtahanı keçirəcək.
DİM-dən Trend-ə verilən məlumata görə, imtahanda iştirak etmək üçün 2889 namizəd qeydiyyatdan keçib. Prosesin idarə edilməsi üçün 243 nəzarətçi-müəllim, 25 imtahan rəhbəri ayrılıb.
İmtahanda namizədlərə 100 test tapşırığı təqdim olunacaq. Onlardan 80 sual qanunvericilik sahəsi üzrə, 10 sual informatika üzrə, 10 sual isə məntiqi nəticə çıxarmaq bacarıqlarının yoxlanılması üçün nəzərdə tutulur. Qanunvericilik üzrə suallar Vergilər Nazirliyi, digər suallar isə DİM tərəfindən hazırlanır.
İmtahan 3 saat davam edəcək. Hər sual 1 balla qiymətləndiriləcək. İmtahan nəticəsində ümumi balı 70 və daha artıq olan namizədlər növbəti mərhələyə buraxılacaqlar.
