Vüqar Bayramov: "Qeydiyyatsız daşınmaz əmlak, bağ və ya torpaq sahəsinin inventar dəyərini müəyyənləşdirmək mümkün deyil"
"Bakıda və Abşeron yarımadasında qanunsuz tikilən evlərin çoxu torpaq, əmlak və digər vergilərə cəlb olunur. Ancaq bu tikililər rəsmiləşdirilməyib". Bunu Milli Məclisin Regional məsələlər komitəsinin sədri Arif Rəhimzadə deyib.
A.Rəhimzadə qanunsuz tikililərlə bağlı problemin əsas səbəbini də açıqlayıb: "Çünki bələdiyyə bilməyib ki, torpaq ona, yaxud başqa bələdiyyəyə məxsusdur. Ona görə də qanunsuz tikililərlə bağlı problem yaranıb. Bələdiyyənin ərazisi dəqiqləşdirilib xəritə veriləndən sonra bələdiyyə biləcək ki, bu torpaq onun ərazisidir, yoxsa yox. Xəritələr müəyyənləşəndən sonra bu problemlərin həlli daha asan olacaq. Çünki indiyə qədər bələdiyyənin başqa bələdiyyənin ərazisində torpaq verməsi halları olub. Buna görə bələdiyyələri təqsirləndirmək də olmaz, çünki bir çox bələdiyyə indiyə qədər ərazisinin hara olduğu, haradan başlayıb harada qurtardığını bilməyib".
Maraqlıdır, rəsmiləşdirilməyən tikililərdən vergi alınması düzgündürmü? İqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, tikililərin vergisi bələdiyyələr tərəfindən toplanır: "Söhbət qanunsuz və qeydiyyatsız tikililərdən gedir. Qeydiyyatsız evlər üzrə vergi inventar dəyər əsasında aparılır. Ancaq qeydiyyatsız daşınmaz əmlak, bağ və ya torpaq sahəsinin inventar dəyərini müəyyənləşdirmək mümkün deyil. Çünki fiziki baxımdan bu evin və ya digər əmlakın varlığını təsdiq edən sənəd yoxdur. Ona görə də qanunsuz tikililərin sahibləri vergi ödəyirsə, çox vacibdir ki, həmin torpağın və ya evin qeydiyyatı da olsun. Əgər torpaq və ya əmlak vergiyə cəlb olunursa, deməli, dövlət qurumu tərəfindən həmin yaşayış yeri qəbul edilib. Əslində, qanunvericiliyin tələbidir ki, evlərin qeydiyyatı rəsmiləşdirilsin".
Həmsöhbətimizin sözlərinə görə, vergi ödənişi tətbiq edilən qanunsuz tikililərlə bağlı bəzi prosedurlar müəyyən olunmalıdır.
İqtisadçı onu da dilə gətirdi ki, fərdi yaşayış evləri və ya torpaq sahələrinin sahibləri bələdiyyələrə vergi ödəyir.
Günel CƏLİLOVA
