Pərviz Heydərov: "Real gəlirlərin hissolunacaq dərəcədə artması haqda ciddi müzakirə aça bilmərik. Bunun üçün inflyasiya səviyyəsi birrəqəmli həddə endirilməlidir"
Azərbaycanda ötən il əhalinin hər nəfərinə düşən gəlirlərin həcmi 4709,8 manata çatıb. Dövlət Statistika Komitəsinin məlumatına əsasən, ötən il bu artım 2015-ci ilə nisbətən 7,5 faiz təşkil edib. Qeyd olunur ki, ötən il Azərbaycan əhalisinin gəlirləri 2015-ci illə müqayisədə nominal ifadədə 8,7 faiz artaraq 45395,1 milyon manata çatıb.
Məsələ ilə bağlı fikrini öyrəndiyimiz İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında bunları qeyd etdi: "Dövlət Statistika Komitəsinin 2016-cı il ərzində ölkənin sosial-iqtisadi inkişafının makroiqtisadi göstəricilərinə dair məlumatına əsasən, qeyd olunan ildə əvvəlki illə müqayisədə əhalinin gəlirləri nominal ifadədə 8,7 faiz artaraq 45395,1 milyon manata çatıb ki, gəlirlərin 76,3 faizi son istehlak xərclərinə, 8,4 faizi vergilərin, sığorta və üzvlük haqlarının, 2,9 faizi kreditlər üzrə faizlərin ödənilməsinə sərf edilib, 12,4 faizi isə yığıma yönəldilib.
Ancaq, eyni zamanda, nəzərə almaq vacibdir ki, 2016-cı ildə əvvəlki ilə nisbətən istehlak məhsullarının və xidmətlərin qiymətləri 12,4, o cümlədən ərzaq məhsullarının qiymətləri 14,7, qeyri-ərzaq məhsullarının qiymətləri 16,7, əhaliyə göstərilən ödənişli xidmətlərin qiymətləri isə 5,8 faiz artıb. Yəni 12,4 faiz inflyasiya baş verib. Odur ki, əhalinin gəlirləri artıb deyəndə, bu daha çox nominal ifadədə nəzərə alınmalıdır. Real gəlirləri 12,4 faizlik inflyasiya səviyyəsi əhəmiyyətli dərəcədə "yemişdir". Yeri gəlmişkən, xatırladım ki, keçən ilin əvvəlində 2015-ci il dekabrın 21-i tarixindəki ikinci devalvasiyanın nəticələrilə əlaqədar olaraq dövlət büdcəsindən maliyyələşən təşkilatlarda əməkhaqları orta hesabla 10 faiz artırılıb. Yəni bu özü də sonradan nominal artımı şərtləndirən amillərdən biri sayılıb. 2016-cı ilin yanvar-noyabr aylarında muzdla işləyənlərin orta aylıq nominal əməkhaqqı 2015-ci ilin müvafiq dövrü ilə müqayisədə 7,0 faiz artaraq 494,3 manat təşkil edib.
Real gəlirlərin hissolunacaq dərəcədə artması haqda, əslində, ciddi müzakirə aça bilmərik. Bunun üçün inflyasiya səviyyəsi birrəqəmli həddə endirilməlidir".
Günel CƏLİLOVA
