"Əhalinin sayının təxminən 14 faizini pensiya alanlar təşkil edir və bu da bizim büdcəmiz üçün böyük rəqəmdir"
Azərbaycanda pensiya üçün tətbiq edilən staj tələbi aradan götürülür. Yeni qanun layihəsinə görə, işçi sosial sığorta üçün daha çox pul ödəyərsə, istədiyi zaman pensiyaya çıxa biləcək. Bunu əmək və əhalinin sosial müdafiəsi naziri Səlim Müslümov mətbuata açıqlamasında bildirib.
Nazir hazırda Azərbaycanda 20 min manatdan çox maaş alan şəxslərin olduğunu və bu yenilik sayəsində yüksək maaş alanların daha tez pensiyaya çıxa biləcəyini bildirib: "2006-cı il yanvarın 1-dən ölkəmizdə tətbiq edilən müasir sığorta-pensiya sistemi bazar iqtisadiyyatı mühitində vətəndaşların pensiya təminatı hüquqlarının etibarlı müdafiəsi məqsədilə hər il əmək pensiyalarının sığorta hissəsinin indeksləşdirilməsini nəzərdə tutur. Bu tədbir nəticəsində istehlak qiymətləri indeksinin illik səviyyəsinə, yəni inflyasiyaya uyğun indeksləşdirmə aparılmaqla, nəticə etibarilə, əmək pensiyalarının ildən-ilə artırılması təmin olunur. 2007-ci ildən ötən müddətdə əmək pensiyalarının sığorta hissəsinin indeksləşdirilməsi ilə bağlı Azərbaycan Respublikası Prezidenti tərəfindən artıq 11 sərəncam imzalanıb və həmin sərəncamlar nəticəsində pensiyalarda mütəmadi artımlar edilib. "Əmək pensiyalarının sığorta hissəsinin indeksləşdirilməsi haqqında" 2017-ci il 21 yanvar tarixli Sərəncam da əmək pensiyalarında növbəti artımın edilməsini nəzərdə tutur".
Ümumilikdə, əmək pensiyası üçün staj məhdudiyyətinin aradan qaldırılmasına ekspertlərin münasibəti necədir? Sözügedən məsələni şərh edən iqtisadçı-ekspert Oqtay Haqverdiyev ümumən buna müsbət prizmadan yanaşır. Onun fikrincə, bənzər məhdudiyyət dünya praktikasında yoxdur: "Azərbaycan bu praktikadan hələ indi istifadə etməyi planlaşdırır. Qərarı Milli Məclis təsdiqləyərsə, 2018-ci ildən bunun icrasına başlanacaq. Ancaq prosesin icrası bir neçə il çəkəcək. Çünki hər il pensiya alanların sayı artır. Buna görə də, ola bilsin, sosial müavinətləri 100 faiz ödəmək üçün məbləğ çatmasın. İndidən ləğv edilir deməklə, iş tamamlanmır. Bütün bunları nəzərə alaraq deyə bilərəm ki, prosesin icrası müəyyən qədər vaxt alacaq. Məndə olan məlumata görə, nazirlik məsələ ilə əlaqədar yeni proqram üzərində çalışır. Həmin proqramda pensiya yaş məsələsi üzrə və sistemin özündə islahatların aparılması nəzərdə tutulub. Əhalinin sayının təxminən 14 faizini pensiya alanlar təşkil edir. Bu da bizim ölkə və büdcəmiz üçün böyük rəqəmdir. Ona görə də nazirliyin təklif etdiyi bu prosesə birdən-birə keçid büdcə üçün heç də asan olmayacaq. Pensiya yaşı artırılarsa, bu hal, az da olsa, büdcəni möhkəmləndirəcək. Ancaq əhalinin sosial rifahına mənfi təsir göstərəcək".
Vidadi ORDAHALLI
