İlqar Hüseynli: "Fikrimcə, bunun səmərəsi olacaq"
Muzdlu işçisi olmayan fiziki şəxslərin hesabat verməkdən azad olunmasının mövcud qanunvericilikdə öz əksini tapması üçün hazırda "Sosial sığorta haqqında" Qanuna dəyişikliklər hazırlanır. Sözügedən məsələ ilə bağlı yayılan məlumata görə, bunu əmək və əhalinin sosial müdafiəsi naziri Səlim Müslümov mətbuat konfransında bildirib.
Nazir bununla bağlı yaranan gecikmələrin səbəbinə aydınlıq gətirib. O bunu müəyyən obyektiv və subyektiv amillərlə əlaqələndirib: "Biz bu məsələdə ona görə gecikdik ki, əsas diqqətimizi fərdi uçot üzrə olan hesabatla sosial sığorta üzrə olan hesabatın birləşdirilməsi məsələsinə yönəltdik. Bu proses baş verdi və bu il artıq 2016-cı il üçün hesabatlar birləşdirilmiş qaydada, vahid hesabatla elektron şəkildə təqdim olunacaq. Bundan sonra biz növbəti addım kimi həmin fiziki şəxslərin hesabat vermək öhdəliyini ortadan qaldıracağıq. Hazırda bunun üzərinə iş gedir və mən belə düşünürəm ki yaxın zamanlarda biz bu prosesə son qoyacağıq".
Məlumat üçün qeyd edək ki, sözügedən məsələ bir ildən çoxdur gündəmdədir. Bir çoxları bunun yersiz olduğunu düşünür.
Maraqlıdır, bəs ekspertlərin sözügedən dəyişikliyə münasibəti necədir?
Məsələyə münasibət bildirən ekspert İlqar Hüseynlinin sözlərinə görə, hesabat şəffaflıq baxımından doğru yanaşma olsa da, sayının çox olması məqsədəuyğun deyil: "Qədərindən artıq hesabatların olması həm vaxt itkisinə gətirib çıxarır, həm də digər problemlər yaradır. Ona görə də sosial-iqtisadi baxımdan əhəmiyyətli yükə malik olmayan bu tipli hesabatların birləşdirilməsi məqsədəuyğundur. Hesabatın daha çevik və sadə halda olması yaxşıdır. Bəzilərinin isə ümumiyyətlə aradan qaldırılmasına ehtiyac var. Belə ki, bunlardan biri də muzdlu işçisi olmayan fiziki şəxslərin hesabat verməsidir. Baxmayaraq ki, buna ehtiyac yoxdur. Bununla bağlı tətbiq ediləcək yeniliklər, istənilən halda, sahibkarlıq və digər fəaliyyətlə məşğul olan şəxslərin vaxt itkisinin qarşısını alacaq. Eyni zamanda, daha səmərəli və çevik şəkildə hesabatların təqdim edilməsində əhəmiyyətli rol oynaya bilər. O üzdən, bu istiqamətdə qəbul olunan qərarları doğru hesab edirəm. Fikrimcə, bunun səmərəsi olacaq".
Vidadi ORDAHALLI
