"Təkrar bazarda qiymətin baha olması onu göstərir ki, istiqrazlara maraq böyükdür"
SOCAR-ın prezidenti Rövnəq Abdullayev mətbuata açıqlamasında bildirib ki, 100 milyon dollarlıq həcmdə buraxılan istiqrazlara tələbat 200 milyon dollardan artıq olub: "İstiqrazların şərtləri hazırkı şərait üçün çox əlverişlidir. SOCAR istiqrazları dollarla, 5 illik müddətə, illik 5 %-lə buraxılıb. Faiz ödənişləri isə ildə 4 dəfə - hər 3 aydan bir həyata keçirilir".
R.Abdullayevin açıqlamasından o da məlum olub ki, istiqrazlara maraq yüksək olduğuna görə bu onların qiymətinə də müsbət təsir edib: "İstiqrazların təkrar bazarda da alqı-satqısı olduqca fəaldır. Biz elan etmişdik ki, istiqrazları ən azı 1000 dollardan, yəni nominal qiymətə almağa hazırıq. Yəni istiqraz sahibləri istiqrazlarını satmaq istəsəydilər, azı bu qiymətə sata biləcəkdilər. Onu da deyim ki, dünyanın heç bir yerində istiqrazlara görə belə şərt qoyulmur. Bizim xarici məsləhətçilərimiz də başa düşə bilmirdilər ki, istiqrazlara niyə belə zəmanət veririk. Biz isə istəyirik ki, vətəndaşlarımız istiqrazların tam təhlükəsiz olduğuna əmin olsun. Amma heç buna ehtiyac olmayıb. İstiqrazını satmaq istəyən şəxslərin istiqrazını başqa müştərilər daha yüksək qiymətə alıblar. Yəni indiyədək heç bir istiqraz 1000 dollara satılmayıb. Bütün satışlar bundan yüksək qiymətə olub".
Bütövlükdə, istiqrazların təkrar bazarda 1000 dollardan baha olması istiqraz sahiblərinə nə verir? Məsələyə münasibət bildirən ekspert Zakir Əhmədovun fikrincə, bu onlara daha çox qazanc imkanı verir: "Təbii ki, kimin nə qədər çox istiqrazı olsa, bunun satışından daha çox gəlir əldə edəcək. Elə şəxslər var ilkin mərhələdə daha çox istiqraz alıb. İstiqrazı almaqda məqsədlərindən biri də onu təkrar bazarda satmaq olub. Eləsi də var ki, istiqrazların bir hissəsini satışa çıxırıb, digərlərini saxlayıb. Bütün hallarda, təkrar bazarda qiymətin baha olması onu göstərir ki, istiqrazlara maraq böyükdür. Müşahidələr göstərir ki, bütün bunlar səbəbsiz deyil. Ona görə ki, banklar o qədər də etibarlı deyil. Bəzi banklarla bağlı yaranan vəziyyət müştərilərin inamını sarsıdıb. Bu səbəbdən imkanlı şəxslər dövlət zəmanətli istiqrazlara daha çox etibar edir. Məsələnin kökündə dayanan amillərdən biri də budur".
Vidadi ORDAHALLI
