Azərbaycan Respublikasının Prezidenti cənab İlham Əliyev tərəfindən 23 dekabr 2016-cı il tarixdə imzalanmış və 2017-ci ilin yanvar ayının 1-dən qüvvəyə minən "Vergi Məcəlləsində dəyişikliklər edilməsi haqqında" və "Vergi ödəyicilərinin 2017-ci ilin 1 yanvar tarixinə mövcud olan vergi borclarının tənzimlənməsi haqqında" qanunların, habelə vergi inzibatçılığında baş vermiş dəyişikliklərin mahiyyətinin sahibkarlara və iş adamlarına çatdırılması məqsədilə Vergilər Nazirliyi ölkənin regionlarında fəaliyyət göstərən vergi ödəyiciləri ilə silsilə görüşləri davam etdirir.
Növbəti görüş yanvarın 23-də Lənkəran şəhərində 6 saylı Ərazi Vergilər İdarəsinin əhatə dairəsinə daxil olan Lənkəran, Astara, Lerik, Masallı, Yardımlı, Cəlilabad və Biləsuvar rayonlarından olan sahibkarlarla keçirilib.
Görüşdə çıxış edən vergilər nazirinin müavini Sahib Ələkbərov Vergi Məcəlləsinə edilmiş dəyişikliklərin əsas məqsədinin ölkədə kiçik və orta biznesin inkişafına daha əlverişli şəraitin yaradılması, vergi yükünün azaldılması, vergi orqanları və sahibkarlıq subyektləri arasında qarşılıqlı etimadın səviyyəsinin yüksəldilməsi, dürüst və şəffaf vergi uçotunun qurulması olduğunu bildirib. Nazir müavini qeyd edib ki, ölkə başçısının təşəbbüsü ilə qəbul olunmuş "Vergi ödəyicilərinin 2017-ci ilin 1 yanvar tarixinə mövcud olan vergi borclarının tənzimlənməsi haqqında" Qanun sahibkarların maliyyə vəziyyətinin sağlamlaşdırılmasına, onların sərəncamında əlavə vəsaitlərin qalmasına, sahibkarlığın inkişafının stimullaşdırılmasına və daha əlverişli biznes mühitinin formalaşdırılmasına xidmət edir. Bütövlükdə, bütün bunlar sahibkarlıqla məşğul olanların sayının artmasına, vergi ödəyicilərinin daha çox qazanc əldə edə bilməsinə və müvafiq olaraq daha çox vergi ödəmələrinə şərait yaratmalıdır. Məqsəd də bundan ibarətdir ki, vergi ödəyiciləri daha çox qazansınlar, daha çox vergi ödəsinlər və Azərbaycan daha sürətlə inkişaf etsin.
Görüşdə çıxış edən Vergilər Nazirliyinin rəhbər vəzifəli şəxsləri Vergi Məcəlləsinə edilmiş əlavə və dəyişikliklərin, həmçinin, "Nağdsız hesablaşmalar haqqında" Qanunun tələblərindən irəli gələn məsələlərin ətraflı izahını verib, bu dəyişikliklərin mahiyyəti barədə vergi ödəyicilərini məlumatlandırıblar.
Tədbirdə vergi ödəyicilərinin pərakəndə ticarətdə uçot sisteminin qurulması, elektron qaimə-fakturaların tətbiqi, sabit vergi və könüllü vergi açıqlaması sistemlərinin mahiyyəti, elektron ödənişlər zamanı xidmət haqqının tutulması və nağd ödəmələrə qoyulmuş limitlər, pos-terminalların fəaliyyəti, faizlər və maliyyə sanksiyaları üzrə yaranmış vergi borclarının silinməsi prosedurları və s. kimi məsələlərlə bağlı çoxsaylı sualları cavablandırılıb. Tədbirdə iştirak edən "Biləsuvar pambıq" ASC-nin nümayəndəsi isə müəssisənin 90-cı illərdə iqtisadi çətinliklər nəticəsində yaranmış vergi borcları üzrə yığılıb qalmış faiz və maliyyə sanksiyalarının silinməsinə görə dövlət rəhbərliyinə xüsusi təşəkkürünü bildirib.
Görüşdə çıxış edən sahibkarlar onlara göstərilən diqqət və qayğıya görə ölkə başçısına minnətdarlıqlarını bildiriblər.
Məlumatı Media və Kommunikasiya Mərkəzi yayıb.
Xəbər xidməti
