Prezident İlham Əliyevin məcburi köçkünlər və onlara bərabər tutulan şəxslər üçün vahid aylıq müavinətin müəyyən edilməsi haqqında fərmanı sosial ədalətin tam təminatıdır. Bunu "Trend"ə açıqlamasında ekspert Bəhruz Quliyev bildirib.
Onun sözlərinə görə, son dövrlər həm mətbuatda, həm də sosial şəbəkələrdə məcburi köçkünlərə dövlət tərəfindən verilən maddi yardımlarla bağlı müzakirələr gedirdi: "Bəzi hallarda yardımların kəsilməsi, yaxud da onların müxtəlif formada əvəzlənməsi ilə bağlı fikirlər yürüdülürdü. Bu isə antimilli fəaliyyətlə məşğul olan şəxslərin manipulyasiyalarına səbəb olur, ölkəmiz əleyhinə xoşagəlməz fikirlərin yaranmasına gətirib çıxarırdı. Azərbaycan Respublikasının Prezidenti cənab İlham Əliyevin imzaladığı bu fərman manipulyativ fikirlərə son qoyaraq, sosial ədalətin təminatı kimi qiymətləndirilə bilər. Belə ki, məcburi köçkünlər və onlara bərabər tutulan şəxslərin sosial müdafiəsi istiqamətində verilən fərman ayrılan vəsaitin ünvanlılığının təmin edilməsi ilə yanaşı, ünvana çatdırılma mexanizminin sadələşdirilməsinə də xidmət edir. Yəni əvvəlkindən fərqli olaraq, həm yemək, həm də kommunal xərclər üçün vəsaitlərin hər kəsin kartına yüklənməsi bəzi qurumların və insan faktorunun müdaxiləsinin qarşısını alır".
B.Quliyev əlavə edib ki, Prezidentin fərmanı ilə məcburi köçkünlər və onlara bərabər tutulan şəxslərə aylıq müavinət olaraq müəyyən edilən 36 manat vəsait hər kəsin şəxsi istifadəsinə veriləcək: "Bu isə sosial ədalətin tam təminatıdır".
Elman Nəsirov məcburi köçkünlərin həyat tərzinin dəyişəcəyini əsaslandırır...
"Trend"ə açıqlamasında millət vəkili Elman Nəsirov deyib ki, bu fərman məcburi köçkünlər və onlara bərabər tutulan şəxslərin həyat tərzini daha da yaxşılaşdıracaq: "Əvvəllər bu qrupa aid olan şəxslər məcburi köçkünlərə ayrılan kommunal xidmətlər üçün nəzərdə tutulan limitləri təsdiqlətmək, məcburi köçkün və onlara bərabər şəxs olduğunu sübut etmək üçün aidiyyəti qurumlara arayışlar təqdim edəndən sonra həmin limitlərdən istifadə edə bilirdilər. Amma bu fərmandan sonra həmin arayışlara ehtiyac qalmayacaq. Artıq həmin məbləğ hər kəsin plastik kartına yüklənəcək. Əvvəllər həmin şəxslərə plastik kart vasitəsilə yalnız yemək pulu ödənilirdisə, indi kommunal xidmətlərin pulu da həmin karta köçürüləcək. Bu, prosesi bir az da asanlaşdıracaq. Bu fərman bir daha onu göstərir ki, Azərbaycan dövlətinin siyasəti sosialyönümlüdür. Hətta 2017-ci ilin dövlət büdcəsi bir qədər yığcam olsa da, həmin büdcənin 40,3 faizi sosialyönümlüdür".
E.Nəsirov bildirib ki, Azərbaycan dövlətinin məcburi köçkünlər və onlara bərabər tutulan şəxslərlə bağlı yürütdüyü siyasət hətta BMT səviyyəsində qəbul olunub və bu siyasət digər dövlətlərə nümunə göstərilir: "Cənab Prezidentin imzaladığı bu fərman da həmin siyasətin davamıdır".
Fəttah Heydərov dövlət başçısının belə addımlarının davamlı olacağını bildirdi
"Azərbaycan Prezidenti bütün təbəqələrin sosial rifah halının yaxşılaşdırılmasına xüsusi diqqət ayırır. Dövlət başçısının məcburi köçkünlərə xüsusi diqqət ayırması göz önündədir. İmzalanan fərman da bu qayğının bariz nümunələrindən biridir".
"Trend"in məlumatına görə, bunu jurnalistlərə açıqlamasında millət vəkili, Respublika Ağsaqqallar Şurasının sədri Fəttah Heydərov dövlət büdcəsindən məcburi köçkünlərin və onlara bərabər tutulan şəxslərin sosial müdafiəsi üçün ayrılan vəsaitin ünvanlılığının təmin edilməsi və çatdırılma mexanizminin sadələşdirilməsi ilə bağlı Prezident İlham Əliyev tərəfindən imzalanan fərmana münasibət bildirərkən deyib.
F.Heydərov bildirib ki, Ermənistan silahlı qüvvələrinin ölkəmizə qarşı törətdiyi hadisələr nəticəsində məcburi köçkün vəziyyətinə düşən vətəndaşlarımızı Azərbaycan Prezidentinin qayğıları yaşadır və gələcəyə ümidləndirir: "Azərbaycan Prezidentinin məcburi köçkünlər və onlara bərabər tutulan şəxslərə aylıq müavinətin ayrılması ilə bağlı fərmanı ölkəmizdə bu təbəqəyə göstərilən diqqətin əsas göstəricilərindəndir. Təbii ki, bu qayğı davamlı olacaq".
Millət vəkili əlavə edib ki, dünyada qlobal böhranlara son qoyulduqdan, haqq-ədalət öz yerini tutduqdan, məcburi köçkünlər öz yurd-yuvalarına qayıtdıqdan sonra onlara qayğı daha da çoxalacaq: "Azərbaycan Prezidentinin işğal olunan ərazilərimiz geri qayıtdıqdan sonra çox böyük planları var. Onlar da tezliklə yerinə yetəcək".
Əməliyyat xərcləri azalacaq, vaxt itkisi olmayacaq, yaranan yeni vəsait...
Dövlət büdcəsindən məcburi köçkünlərin və onlara bərabər tutulan şəxslərin sosial müdafiəsi üçün ayrılan vəsaitin ünvanlılığının təmin edilməsi və çatdırılma mexanizminin sadələşdirilməsi ilə bağlı Prezident İlham Əliyev tərəfindən imzalanan fərman həmin kateqoriyadan olan ailələrin sosial müdafiəsi üçün atılan addımlardandır. Bu barədə "Trend"ə açıqlamasında millət vəkili Tahir Mirkişili deyib.
Millət vəkili bildirib ki, dövlətin sosial siyasətinin əsas məqsədlərindən biri sosial qayğıya və təminata ehtiyacı olan vətəndaşların həyat şəraitinin yüksəldilməsidir: "Sosial xərclərin əsas effektivliyi ilə onların ünvanlılığı arasında birbaşa asılılıq var. Bu baxımdan dövlət başçısının fərmanı ilə dövlət büdcəsindən məcburi köçkünlərin və onlara bərabər tutulan şəxslərin sosial müdafiəsi üçün ayrılan vəsaitin ünvanlılığının təmin olunması məqsədilə atılan addım bütövlükdə bu sistemin effektivliyinin artırılmasına yönəlib. Bu mexanizm həm də qarşılılıqlı hesablaşmalar sistemində əməlliyat xərclərinin azalmasına, vaxt itkisinin qarşısının alınmasına və çevikliyin artırılmasına səbəb olacaq. Beləliklə, maliyyə idarəetməsində nail olunan əlavə effektivliyin nəticəsində əldə olunan qənaət hesabına gələcəkdə məcburi köçkünlərin və onlara bərabər tutulan şəxslərin sosial müdafiəsi üçün daha çox iş görmək mümkün olacaq".
Yerdə qalan məbləğ isə məcburi köçkünlərin özlərində qalacaq
Milli Məclisin deputatı Aqil Abbas bildirib ki, birincisi, bundan sonra məcburi köçkünlərin kommunal və digər xidmətlər üzrə dövlət büdcəsindən ödənişlərdən istifadəsi xeyli asanlaşacaq: "Tutaq ki, indiyə qədər məcburi köçkünlər kommunal xərclər üçün ödənişlərdən istifadə etmək üçün müvafiq qurumdan arayış almalı idi, lakin bundan sonra heç bir arayış almağa ehtiyac qalmayacaq, həmin pul birbaşa məcburi köçkünün kartına köçürüləcək. Hər bir məcburi köçkün ailəsi biləcək ki, onun kartına nə qədər pul ayrılır və bu pulu necə xərcləyəcəklərini özləri müəyyən edəcəklər".
Deputat əlavə edib ki, digər tərəfdən, məcburi köçkünlər kommunal xidmətlər üçün dövlət tərəfindən ayrılan puldan tam istifadə etmirdilər, xüsusən də yay aylarında bu qalıqlar xeyli yığılırdı, lakin məcbur köçkünlər bu vəsaitdən istifadə edə bilmirdilər: "Bundan sonra həmin vəsait onlara ödəniləcək. Yerdə qalan məbləğ isə məcburi köçkünlərin özlərində qalacaq və bu vəsaiti onlar istədikləri kimi xərcləyə biləcək. Bu, məcburi köçkünlərin sosial müdafiəsinin yaxşılaşdırılması istiqamətində atılan addımdır".
Müavinətin taleyi məcburi köçkünün özündən asılı olacaq...
"Cənab Prezidentin məlum fərmanı ilə qaçqın və məcburi köçkünlərin sosial müdafiəsi daha dəqiq mexanizmlə təmin olunacaq, daha da güclənəcək və sosial müdafiənin ünvanlılıq prinsipi təmin olunacaq".
Bunu APA-ya açıqlamasında Milli Məclisin Əmək və sosial siyasət komitəsinin sədr müavini Musa Quliyev deyib. O bildirib ki, əgər buna qədər istər enerji daşıyıcıları, istərsə də çörəklə bağlı qaçqın və məcburi köçkünlərə ayrılan normalar müvafiq qurumlar tərəfindən verilirdisə, bundan sonra hər məcburi köçkünə konkret 36 manat ayrılacaq və onlar birbaşa bu məbləğdən istifadə edə biləcək: "Eyni zamanda, vəsait itkisinin qarşısı alınacaq, mexanizmlər sadələşəcək və hər bir qaçqın, məcburi köçkün ona ayrılan vəsaiti özünə uyğun şəkildə istifadə etmək imkanı qazanmış olacaq. Bu mənada Prezidentin fərmanı irəliyə atılmış bir addımdır".
M.Quliyevin sözlərinə görə, fərmanın mahiyyəti ondan ibarətdir ki, ayrılan müavinətlərin taleyi qaçqın və məcburi köçkünlərin özlərindən asılı olacaq, nəinki hansısa qurumdan: "Pul onların kartına oturulacaq, yaxud nağd şəkildə veriləcək, bu artıq prinsipial deyil. Əsas odur ki, birbaşa özlərinə veriləcək".
Baki-xeber.com
