Natiq Cəfərli: "Minimum əməkhaqqını və təqaüdlərin həcmini nəzərə alsaq, işsizliyə görə verilən müavinət heç də kiçik məbləğ sayılmır"
Bu ilin yanvar ayının 1-i vəziyyətinə məşğulluq xidməti orqanları tərəfindən Azərbaycan üzrə rəsmi işsiz statusu verilən şəxslərin sayı açıqlanıb. Hesabata əsasən, ölkədə rəsmi işsiz statusu verilən şəxslərin sayı 33,0 min nəfər olub, onların 38,1 faizini qadınlar təşkil edib. İşsiz statusu alan şəxslərdən 14 812 nəfəri Bakıda yaşayır.
İşsizliyə görə müavinətin orta məbləği 257,0 manat olub.
Məsələ ilə bağlı fikir bildirən iqtisadçı-ekspert Natiq Cəfərli "Bakı-Xəbər"ə açıqlamasında qeyd etdi ki, rəsmi qeydiyyatdan keçən şəxs işsiz sayılır. Nəzərə almaq lazımdır ki, rəsmi qeydiyyatdan keçmə proseduru olduqca çətindir. İnsanların da işsizliklə bağlı qeydiyyatdan keçmə qaydalarından xəbərsiz olması statistikaya öz təsirini göstərir: "Əhali sayı 9 milyondan çox olan ölkəmizdə son zamanlar yaşanan iqtisadi çətinlik əhalinin işlə təminatına təsir edib. Rəsmi qurumlar yalnız qeydiyyatdan keçən işsizlərə işsiz statusu verdiyi üçün rəqəm kiçik görsənir. Ancaq reallıqda işsizlərin sayı açıqlanandan çoxdur".
Həmsöhbətimiz onu da əlavə etdi ki, işsizliyə görə verilən müavinətin həcmi isə normaldır. İşsizliyə görə müavinətin orta məbləğinin 257 manat olması aşağı məbləğ deyil: "Minimum əməkhaqqını və təqaüdlərin həcmini nəzərə alsaq, işsizliyə görə verilən müavinət heç də kiçik məbləğ sayılmır. İşsizliklə bağlı fəaliyyət göstərən qurumların fəaliyyəti tək müavinətlərlə bağlı deyil, həmçinin, işsizlərin işlə təmin olunmasıdır. Əsas hədəf işsizlərin işlə təmin olunmasına şərait yaratmaqdır. Yaxşı olar ki, iş üçün müraciət edən şəxsin peşəsinə uyğun iş yoxdursa, onun ixtisas dəyişməsinə köməklik göstərilsin".
İqtisadçının sözlərinə görə, ölkənin müxtəlif bölgələrində işlə bağlı yaradılan məlumat bazaları daha da təkmilləşdirilməlidir. Bir çox sahələr üzrə yeni yanaşma və yeni addıma ehtiyac var.
Günel CƏLİLOVA
