Aydın Mirzəzadə: "Bu, məcburi köçkünlərə özlərinin ailə büdcəsini daha səmərəli qurmağa, sərbəst qalan vəsaiti istədiyi kimi istifadəyə imkan verir"
Xəbər verildiyi kimi, Prezident İlham Əliyev məcburi köçkünlər və onlara bərabər tutulan şəxslər üçün vahid aylıq müavinətin müəyyən edilməsi haqqında fərman imzalayıb.
Fərmanda qeyd olunur ki, dövlət büdcəsindən məcburi köçkünlərin və onlara bərabər tutulan şəxslərin sosial müdafiəsi üçün ayrılan vəsaitin ünvanlılığının təmin edilməsi və çatdırılma mexanizminin sadələşdirilməsi məqsədilə məcburi köçkünlər və onlara bərabər tutulan şəxslər üçün yemək xərci müavinəti, habelə kommunal və digər xidmətlər üzrə dövlət büdcəsindən ödənişlər əvəzinə 2017-ci il 1 yanvar tarixindən hər bir məcburi köçkün və onlara bərabər tutulan şəxslər üçün 36 manat məbləğində vahid aylıq müavinət müəyyən edilib.
Nazirlər Kabinetinə bu fərmanda göstərilən vahid aylıq müavinətin şamil ediləcəyi kontingenti və müavinətin ödənilməsi qaydasını müəyyən edib Azərbaycan Prezidentinə məlumat vermək; Azərbaycan Respublikası Prezidentinin aktlarının bu fərmana uyğunlaşdırılması ilə bağlı təkliflərini bir ay müddətində hazırlayıb Azərbaycan Prezidentinə təqdim etmək; bu fərmandan irəli gələn digər məsələləri həll etmək tapşırılıb.
Azərbaycan Respublikasının Dövlət Neft Şirkəti, "Azərişıq" Açıq Səhmdar Cəmiyyəti və "Azərsu" Açıq Səhmdar Cəmiyyəti məcburi köçkünlərin məskunlaşdığı yerlərdə sayğacların quraşdırılmasını qısa müddətdə təmin etməlidir.
Sözügedən məsələni dəyərləndirən millət vəkili, politoloq Aydın Mirzəzadə hesab edir ki, məcburi köçkünlər və onlara bərabər tutulan şəxslər üçün vahid aylıq müavinətin müəyyən edilməsi onların əvvəlki xərc və kommunal müavinətlərinin birbaşa pul vahidi ilə əvəzlənməsinə gətirib çıxarır: "Cənab Prezidentin məcburi köçkünlər və onlara bərabər tutulan şəxslər üçün vahid aylıq müavinətin müəyyən edilməsi haqqında fərmanı göstərdi ki, ölkə başçısı əhalinin bütün təbəqələri, ilk növbədə məcburi köçkünlər, eləcə də bu təbəqəyə bərabər tutulan şəxslərin sosial vəziyyətini daim diqqətdə saxlayır. Bu, məcburi köçkünlərə özlərinin ailə büdcəsini daha səmərəli qurmağa, sərbəst qalan vəsaiti istədiyi kimi istifadəyə imkan verir. Eyni zamanda qeyd edim ki, bütün bunlar hər bir ailə üzvü üçün nəzərdə tutulub. Ona görə də böyük ailələr üçün bu böyük məbləğdir. Bu, məcburi köçkünlərə dövlət tərəfindən yeganə maddi diqqət deyil. Biz bilirik ki, ən azı 25 min məcburi köçkün ailəsi üçün Bakıda və digər regionlarda dövlət hesabına mənzillər tikilir. Məcburi köçkün ailəsi ödənişli məktəblərdə oxuduqda onlar təhsil haqqından azad edilir. Həmçinin digər güzəştlər də nəzərdə tutulur. Azərbaycan dövləti bundan sonra da məcburi köçkünlərin, sosial diqqətə ehtiyacı olan bütün vətəndaşların maddi vəziyyətinin yüksəldilməsi üçün mütəmadi addımlar atacaq".
Vidadi ORDAHALLI
