"İstiqrazlardan əldə olunan gəlirlərin avrobondların alınmasına yönəldilməsi Azərbaycan iqtisadiyyatının xeyrinədir"
SOCAR-ın prezidenti Rövnəq Abdullayev Azərbaycanda ilk dəfə buraxılan SOCAR istiqrazları, onların investorlar üçün yaratdığı gəlir imkanları və ilk faiz ödənişi ilə bağlı mətbuata müsahibə verib.
O, müsahibəsində sözügedən məsələlərlə bağlı bir sıra məqamlara toxunub. Bununla yanaşı, R.Abdullayevin müsahibəsindən məlum olub ki, istiqraz satışından əldə olunan 100 milyon dollar vəsait avrobondların geri alınmasına sərf olunur: "İstiqrazlardan əldə olunan vəsaitlər ilk növbədə xaricdə buraxdığımız avrobondların geri alınmasına sərf olunur. İstiqraz buraxmaqla biz, əvvəla, xaricə hər il milyonlarla dollar faiz ödəməyin qarşısını alırıq, bu faizlər əcnəbilərə gəlir qazandırmaqdansa, öz vətəndaşlarımıza ödənilir və valyuta da ölkəmizdə qalır. İkincisi, SOCAR-ın özünün faiz xərcləri azalır, vəsaitlərimizi daha səmərəli istifadə edirik. Üçüncüsü isə, bildiyimiz kimi, indi vətəndaşlarımız öz pullarının 80 faizini, bəlkə də daha artığını dollara çevirib passiv vəziyyətdə evlərdə və seyflərdə saxlayırlar. Bu pullar nə iqtisadiyyata, nə də öz sahiblərinə gəlir gətirir. SOCAR istiqrazlarının buraxılması isə imkan verir ki, hazırda heç bir fayda verməyən bu pullar aktiv iqtisadiyyata cəlb olunsun".
Maraqlıdır, bəs ekspertlər xaricdə buraxılan avrobondların geri alınmasının Azərbaycan üçün faydasını necə dəyərləndirir?
Məsələyə münasibət bildirən millət vəkili Aydın Hüseynov bu istiqamətdə SOCAR-ın gördüyü işlərə müsbət prizmadan yanaşdığını bildirdi: "İstiqrazlar buraxılarkən ümumən başlıca məqsəd ölkə iqtisadiyyatının inkişaf etdirilməsi üçün mənbələrin axtarılmasından ibarət idi. Ona görə də istiqrazlar buraxıldı və buna maraq artmağa başladı. Nəticədə Dövlət Neft Şirkətinin, Maliyyə Nazirliyinin istiqrazları buraxıldı. Bu da qiymətli kağızlar bazarına müsbət təsir göstərdi. Ona görə ki, qiymətli kağızlar bazarında ən etibarlı vasitələrdən biri istiqrazlardır. İstiqrazlardan əldə olunan dividendlər hesabına ölkə iqtisadiyyatının inkişafı ilə yanaşı, dövlət öhdəliklərinin yerinə yetirilməsində də ciddi işlər görüldü. İstiqrazlar bu məsələdə çox əhəmiyyətli rol oynayır. Bütün bunlarla yanaşı, ötən illərdə Azərbaycan avrobondlar buraxıb. Təcrübə göstərdi ki, xaricdə avrobondlara maraq böyükdür. İstiqrazlardan əldə olunan gəlirlərin avrobondların alınmasına yönəldilməsi Azərbaycan iqtisadiyyatının xeyrinədir. Bu, ölkə iqtisadiyyatının dayanıqlı və davamlı inkişafına kömək edəcək".
Vidadi ORDAHALLI
