Rəsul Cahangirli: "Bütün bunlarla yanaşı, görülən sistemli işlər Azərbaycanın maliyyə bazarının..."
SOCAR prezidenti Rövnəq Abdullayev mətbuata açıqlamasında bu günlərdə istiqrazlar üzrə ilk faiz ödənişinin həyata keçirilməsinə toxunub. Onun fikrincə, SOCAR istiqrazlarının buraxılması şirkət üçün çox mühüm hadisə olub: "İşin maliyyə tərəfindən başqa, bu addım nəticəsində ölkə vətəndaşları ilə SOCAR arasında bir tərəfdaşlıq da yarandı. İstiqrazlar üzrə ilk faiz ödənişini həyata keçirdik. İstiqraz sahiblərinin hesabına 1,25 milyon dollar köçürüldü. Bu, Azərbaycan maliyyə bazarında çox vacib bir addımdır".
O da məlumdur ki, SOCAR bu il ərzində istiqraz sahiblərinə ümumilikdə 5 milyon dollar faiz ödəyəcək. R.Abdullayev hesab edir ki, faizlərin ödənilməsi ilə bağlı heç bir çətinlik olmayacaq. O bunu tutarlı arqumentlərlə əsaslandırıb: "Şirkətimiz 40 milyard manatlıq aktivləri, 13,5 milyard manatlıq səhm kapitalı, 1,6 milyard manatlıq nizamnamə kapitalı ilə Azərbaycanda ən etibarlı borc ödəyicisidir. Bu etibarlılıq xaricdə buraxdığımız avrobondlara xarici investorların göstərdiyi yüksək maraqla da öz təsdiqini tapıb. Bu səbəbdən, SOCAR-ın maliyyə imkanlarını nəzərə alanda, faiz ödənişləri üçün heç bir narahatlıq yoxdur. Əksinə, onu da deyim ki, hətta faizlərin pulunu bir həftə əvvəldən köçürmüşdük ki, ödəniş vaxtında olsun. Növbəti ödənişlər də bu formada vaxtında olacaq. Yəni istiqraz sahibləri rahat şəkildə gəlirlərini əldə edəcək. Bundan başqa, SOCAR buraxdığı istiqrazların likvidliyini 5 il boyunca daim təmin edəcək, bazarda alıcı qismində çıxış edərək, investorların maliyyə itkisi ilə üzləşmələrinin qarşısını alacaq".
Bütün bu deyilənlərin fonunda faizlərin ödənişi ilə bağlı istiqraz sahiblərinin hesabına 1,25 milyon dollar köçürülməsi və ümumən il ərzində 5 milyon dolların ödəniləcəyi nə kimi perspektiv vəd edir?
Məsələyə münasibət bildirən ekspert Rəsul Cahangirlinin sözlərinə görə, faiz ödənişlərinin həyata keçirilməsinin perspektivi çoxşaxəlidir: "Bunun başlıca perspektivi ondan ibarətdir ki, istiqrazlara etimad və inam artır. Bu da, öz növbəsində, buna marağın artmasını özündə ehtiva edir. Bütün bunlarla yanaşı, görülən sistemli işlər Azərbaycanın maliyyə bazarının canlanmasına, ölkənin dünya maliyyə bazarlarında layiqli yer tutmasına bu və ya digər dərəcədə müsbət təsir göstərir. Unutmaq olmaz ki, bununla bağlı il ərzində 5 milyon dollar faiz ödənişinin həyata keçirilməsi Azərbaycana böyük dividendlər gətirəcək. Gələcək dividendlərlə müqayisədə faiz ödənişlərinin həcmi çox kiçik görünəcək. Bir zamanlar xarici neft şirkətləri "Əsrin kontraktı" layihəsinə milyardlarla dollar sərmayə qoydular, bir neçə ildən sonra qoyduqları sərmayəni neft satışından əldə edilən gəlir hesabına götürdülər".
Vidadi ORDAHALLI
