Ruslan Atakişiyev: "Bu addımı müsbət qiymətləndirirəm"
Prezident İlham Əliyev minimum aylıq əməkhaqqının artırılması haqqında sərəncam imzalayıb. Sərəncamla Azərbaycanda minimum aylıq əməkhaqqının məbləği 2017-ci il yanvarın 1-dən 116 manat müəyyən edilib. Məlumat üçün qeyd edək ki, indiyədək minimum əməkhaqqı 105 manat olub.
Prezident, həmçinin, əmək pensiyalarının sığorta hissəsinin indeksləşdirilməsi haqqında sərəncam imzalayıb. Sərəncama əsasən, Əmək və Əhalinin Sosial Müdafiəsi Nazirliyinə tapşırılır ki, 2016-cı il üzrə istehlak qiymətləri indeksinə uyğun olaraq, 2017-ci ilin 1 yanvar tarixinə:
1.1. bütün növ əmək pensiyalarının sığorta hissəsinin artırılmasını təmin etsin;
1.2. fərdi uçot sistemində fərdi hesabların sığorta hissəsində toplanmış pensiya kapitalı məbləğlərinin indeksləşdirilməsini həyata keçirsin.
Azərbaycan Respublikasının Nazirlər Kabinetinə bu sərəncamdan irəli gələn məsələləri həll etmək tapşırılıb.
Bütövlükdə, indiki şəraitdə Prezidentin məlum qərarını ekspertlər necə dəyərləndirir?
Məsələyə münasibət bildirən İqtisadi Resursların Öyrənilməsi Mərkəzinin sədri Ruslan Atakişiyev Prezidentin qərarına ümumən müsbət prizmadan yanaşdı: "Məsələ ondadır ki, ötən il orta hesabla 11 faiz inflyasiya olmuşdu. İlin əvvəlində 13 faizə qalxmışdı. Ona görə də inflyasiya çərçivəsində və həmçinin, qiymətlərin indeksləşdirilməsini nəzərə aldıqda, bu artımlar olmalı idi. Bununla yanaşı, bazarda da devalvasiyanın, inflyasiyanın təsirindən qiymətlər bahalaşıb. O üzdən, pensiya və əməkhaqlarının artırılmasına bir zərurət yaranmışdı. Belə bir məqamda artıma qərar verildi. Onu da nəzərə almalıyıq ki, inkişaf etmiş ölkələrdə də pulun dəyərdən düşməsi fonunda pensiya və maaşların artırılması həyata keçirilir. Mövcud qanunvericiliyə görə, 63 yaşına çatmış kişilərin və 60 yaşına çatmış qadınların azı 12 il sosial sığorta stajı olduqda yaşa görə əmək pensiyası hüququ var. Yaşa görə əmək pensiyasının baza hissəsinin məbləği 2016-cı il fevralın 1-dən 110 manat müəyyən edilib. Bu kateqoriyalı pensiyaçıların aldığı cəmi məbləğin yerdə qalanını sığorta və yığım hissəsi təşkil etməlidir. Prezidentin son fərmanı ilə fərdi uçot sistemində fərdi hesabların sığorta hissəsində toplanmış pensiya kapitalının (baza hissəsindən çox olan məbləğlərin) 12,4 faiz artımla indeksləşdirilməsi həyata keçiriləcək".
Vidadi ORDAHALLI
