"Çox vacibdir ki, Azərbaycan iş adamları ixrac məhsullarının dəyərini ölkəyə qaytarsın"
"Dövlət Gömrük Komitəsi Azərbaycandan ixrac olunan məhsulların dəyərinin ölkə ərazisinə gətirilməsinə daha ciddi nəzarət edəcək. Çünki xaricdə satılan Azərbaycan malları üzrə valyutanın bir hissəsinin ölkəyə vaxtında daxil olmadığına dair şübhələr yaranıb".
Yayılan məlumata görə, bunu keçirdiyi mətbuat konfransında Dövlət Gömrük Komitəsinin sədri Aydın Əliyev bildirib. Onun fikrincə, ixrac olunan məhsulun pulu xaricdə dövriyyəyə cəlb olunur: "İxracatçı pulu qabaqcadan ödənilməyən vəziyyətdə bankdan zəmanət məktubu alıb gömrük orqanına təqdim edirdi. Sonradan bu sənədin təqdim edilməsi ləğv edildi. Məqsəd sənədlərin azaldılması, ticarətin sadələşdirilməsi idi. Amma biz hiss edirik ki, bu, pulların xaricdən gec gətirilməsinə, xaricdə dövriyyəyə buraxılmasına şərait yaradır. Biz yenidən zəmanət məktubu alınıb gömrük orqanlarına təqdim edilməsinin bərpasını istəyirik və bu barədə təklifimizi hazırlayıb hökumətə təqdim etmişik. İndiki valyuta qıtlığı şəraitində satılan məhsulların pulunun ölkəyə gətirilməsi çox vacibdir".
Qeyd edək ki, Dövlət Gömrük Komitəsi xarici valyutanın sərhəddən keçirilməsinə nəzarət etməyə cavabdehdir.
Maraqlıdır, bəs ekspertlər yenidən zəmanət məktubu alınıb gömrük orqanlarına təqdim edilməsinə necə yanaşır?
Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert Vüqar Bayramov, prinsipcə, bunu mümkün hesab edir: "Burada söhbət ixrac nəticəsində əldə edilən valyutanın bir hissəsinin geri qaytarılmamasından gedir. Sözsüz ki, valyutanın bir hissəsinin ölkəyə vaxtında daxil olmaması yaxşı hal deyil. Çünki həmin vəsaitlərin qayıtması, nəticə etibarilə, ölkəyə valyutanın daxil olmasına təkan verir. Həmçinin, bu, daxil olan valyutanın həcmini artıra bilər. O baxımdan hesab edirəm ki, bu çox ciddi məsələdir. Çünki valyuta xaricdə dövriyyəyə cəlb olunursa, bu zaman daxilolmalar azalır. Bu da, öz növbəsində, ixracdan ölkəyə daxil olan vəsaitin azalmasına gətirib çıxarır. Belə olan halda, hesab edirəm ki, bu istiqamətdə müəyyən addımların atılmasına ehtiyac var. İxrac nəticəsində əldə edilən valyutanın ölkəyə daxil olmasının təmin edilməsinə ehtiyac var. Bu kontekstdən çox vacibdir ki, Azərbaycan iş adamları ixrac məhsullarının dəyərini ölkəyə qaytarsın. Bununla yanaşı, müvafiq dövlət qurumları, eləcə də Maliyyə Bazarına Nəzarət Palatası, Mərkəzi Bank da bu istiqamətdə fəaliyyətini şaxələndirməlidir. Beləliklə, ixrac nəticəsində əldə edilən valyutanın Azərbaycana daxil olmasına tam nail olmaq mümkündür".
Vidadi ORDAHALLI
