Vahid Əhmədov: "Azərbaycanda müəyyən qədər vəziyyəti dəyişmək və manatı stabilləşdirmək üçün ixracı stimullaşdırmaq lazımdır"
Azərbaycanda idxal və ixrac əməliyyatları ilə məşğul olanların (xarici iqtisadi fəaliyyət iştirakçıları) sayı kəskin artıb. Dövlət Gömrük Komitəsinin yaydığı məlumata əsasən, xarici iqtisadi fəaliyyət iştirakçılarının sayı 2016-cı ildə 2015-ci illə müqayisədə 2 dəfə artaraq 14055-ə çatıb. 2014-cü ildə 6372 şəxs, 2015-ci ildə 7159 şəxs xarici iqtisadi fəaliyyət iştirakçısı idi.
Ötən il xarici iqtisadi fəaliyyətlə məşğul olan 14055 şəxsin 8620-si fiziki şəxs, 5435-i hüquqi şəxs olub. 2015-ci ildə 3 566 fiziki şəxs, 3 593 hüquqi şəxs ixrac və idxal əməliyyatları ilə məşğul olub.
2016-cı ildə xarici iqtisadi fəaliyyətlə məşğul olan şirkətlərin (hüquqi şəxslərin) sayı 1842 şəxs artaraq 5435-ə yüksəlib.
Xarici iqtisadi fəaliyyətlə məşğul olan fiziki şəxslərin sayı daha çox artıb. 2016-cı ildə belə fəaliyyətlə məşğul olan fiziki şəxslərin sayı 5054 şəxs artaraq 8620-yə çatıb.
Ticarət əlaqələri qurulan ölkələrin də sayı artır. 2016-cı ildə Azərbaycanın hüquqi və fiziki şəxsləri dünyanın 186 ölkəsindəki tərəfdaşları ilə ticarət əməliyyatları həyata keçirib. 2014-də ölkələrin sayı 150, 2015-ci ildə isə 165 olub.
Xarici iqtisadi fəaliyyət iştirakçılarının sayının artması idxalda inhisarın azalması ilə əlaqələndirilir.
Azərbaycanda idxal və ixrac əməliyyatları ilə məşğul olanların sayının artması gözlənilən idi.
Millət vəkili Vahid Əhmədov "Bakı-Xəbər"ə açıqlamasında qeyd etdi ki, Gömrük Komitəsinin yaydığı məlumat həqiqətdir: "Etiraf etmək lazımdır ki, idxal sahəsində azalmalar müşahidə olunur, ancaq ixracatda isə vəziyyət müsbətə doğru dəyişir. İxraca daha çox üstünlük verilir. Ölkə başçısı İlham Əliyevin göstərişinə əsasən, ixracyönümlü məhsulların istehsalına diqqət artırılıb. Və Azərbaycanda da müəyyən qədər vəziyyəti dəyişmək və manatı stabilləşdirmək üçün ixracı stimullaşdırmaq lazımdır. Bəllidir ki, bu sahədə bir sıra qanunlar qəbul olunub. Prezident İlham Əliyevin imzaladığı sərəncamlardan sonra ixracatda aktivlik hiss olunur. Aktivlik əsasən ixracatda özünü göstərir. Bizi ixrac maraqlandırır. İxrac nə qədər yüksək olsa, Azərbaycanın iqtisadi vəziyyəti bir o qədər yüksək olar".
Millət vəkili onu da diqqətə çatdırdı ki, ixrac əməliyyatları ilə məşğul olanların sayı
gələcəkdə daha da artacaq.
Günel CƏLİLOVA
